Gürcüstanın paytaxtı Tbilisidə keçirilən cüdo üzrə Avropa çempionatında Azərbaycan ümumi sıralamada 7-ci sıraya düşüb.

Prosport.Az-ın Tbilisiyə ezam olunmuş əməkdaşının verdiyi xəbərə görə, bu gün daha bir bürünc medal qazansaq da, digər millilərin nəticələri komandamızın 6-cı yeri 7-yə dəyişməsinə səbəb olub.

Hazırda Azərbaycan 1 gümüş və 3 bürünc medalla 7-ci sıradadır. Gürcüstan bu gün daha bir qızıl medal qazanmaqla liderliyi ələ keçirib. Meydan sahibləri 5 finaldan 3 qızıl və 2 gümüş medal əldə edib. Fransa ən çox medal qazanan ölkə olsa da, medalın əyarına görə 2-cidir (2-3-4). Rusiya 3-cüdür (2-1-2).

Qeyd edək ki, sabah yarışda son gündür. Komandamızdan olimpiya, dünya və Avropa çempionu Zelim Kotsoyev (100 kq), Kənan Nəsibov (+100 kq) və Mədinə Kaisinova (+78 kq) medal üçün mübarizəyə qoşulacaq.

Xatırladaq ki, Azərbaycan ötən il Monteneqronun paytaxtı Podqoritsada keçirilmiş Avropa çempionatında 1 gümüş və 4 bürünc medalla 10-cu olmuşdu.