Gürcüstanın paytaxtı Tbilisdə keçirilən cüdo üzrə Avropa çempionatında bürünc medal qazanan Zelim Tçkayev (81 kq) mükafatlandırmadan sonra müsahibə verib.

Prosport.Az-ın Tbilisiyə ezam olunmuş əməkdaşının da iştirak etdiyi müsahibədə osetin legioner əvvəlcə 2-ci dəfə Avropa çempionatında 3-cü yer tutmasından danışıb.

– Yarımfinaldan kiçik məyusluğum olsa da, ümumilikdə çox şadam. Bizim – yığmanın və şəxsən özümün medalım var

– Bu rəqibə, səhv etmirəmsə, gürcü Tata Qriqalaşviliyə 6-cı dəfə məğlub olursunuz. Hansısa psixoloji məqam vardı?
– Bunu məşqçimizlə araşdıracağıq. Düşünmürəm ki, psixoloji məqam vardı. Sadəcə, o bu gün güclü idi. Səhvlər üzərində işləyib onları düzəltmək lazımdır.

– Hakimlərin Balabəy Ağayev və Hidayət Heydərov haqqında qərarları sizə nə dərəcədə təsir etdi?
– Heç cür təsir etmədi.

– Avropa çempionu rusiyalı Timur Arbuzov oldu. Sizcə, çempionluğa layiq idi?
– Onunla əvvəllər qarşılaşmışam. Güclü idmançıdır. Düşünürəm ki, qızıl medala layiq idi.

– Bakıdakı dünya çempionatında sizdən nə gözləyək?
– Qızıl medal.

Səbuhi Musa