Azərbaycan cüdoçusu Zelim Tçkayev (81 kq) Gürcüstanın paytaxtı Tbilisidə keçirilən Avropa çempionatında bürünc medal qazanıb.

Prosport.Az xəbər verir ki, idmançı üçüncü yer uğrunda görüşdə belçikalı Matias Kassa vaza-ari ilə qalib gəlib. Bununla da Tçkayev fəxri kürsünün 3-cü pilləsinə qalxıb.

Xatırladaq ki, Avropa çempionatı sabah başa çatacaq. Daha əvvəl Hidayət Heydərov (73 kq) gümüş, Əhməd Yusifov (60 kq) və Turan Bayramov (66 kq) bürünc medal qazanıb.

Bu gün mübarizəyə qoşulan digər təmsilçilərimizdən Südabə Ağayeva (70 kq) 1/8 finalda Sofi Özbas (Macarıstan), eyni mərhələdə Ömər Rəcəbli (81 kq) Vasiliye Qruyiçiç (Serbiya) və Murad Fətiyev (90 kq) 1/16 finalda Aleks Kretsə (Rumıniya) uduzaraq yarışı mükafatsız başa vurub.

14:37

Azərbaycanın cüdoçusu Zelim Tçkayev (81 kq) Gürcüstanın paytaxtı Tbilisidə keçirilən Avropa çempionatında yarımfinal görüşündə məğlub olub.

Prosport.Az xəbər verir ki, idmançı finala gedən yolda Tato Qriqalaşviliyə (Gürcüstan) yuko xalı ilə uduzub.

Təmsilçimiz bürünc medal uğrunda güləşəcək.

13:30

Gürcüstanın paytaxtı Tbilisidə keçirilən cüdo üzrə Avropa çempionatında bu gün 4 cüdoçumuz mübarizəyə qoşulub.

Prosport.Az-ın Tbilisiyə ezam olunmuş əməkdaşının xəbərinə görə, 1 cüdoçumuz medal qazanmaq şansını qoruyub saxlayıb.

Belə ki, 81 kq-da son dünya və Avropa mükafatçısı Zelim Tçkayev 1/16 finalda Natse Xerkoviçi (Sloveniya) vaza-ari ilə, 1/8 finalda Georgi Qramatikovu (Bolqarıstan) və 1/4 finalda Vasiliye Qruyiçiçi (Serbiya) isə ipponla məğlub edərək yarımfinala vəsiqə qazanıb. Osetin legionerimizin bu mərhələdəki rəqibi olimpiya mükafatçısı, üçqat dünya və üçqat Avropa çempionu Tata Qriqalaşvili (Gürcüstan) olacaq.

Eyni çəkidə mübarizə aparan Ömər Rəcəbli isə Əbdül-Kərim Tasuyevə (Rusiya) yuko ilə qalib gəlsə də, 1/8 finalda Vasiliye Qruyiçiçə ipponla uduzaraq mübarizəni dayandırıb.

Son Avropa çempionatının bürünc mükafatçısı Murad Fətiyev (90 kq) isə ümidləri doğrultmayıb. O, ilk görüşdə Aleks Kretsə (Rumıniya) 2 vaza-ari ilə uduzaraq medalsız qalıb.

Qadınlarda İslamiadanın qalibi olmuş Südabə Ağayeva (70 kq) 1/32 finalda Maya Qoşeni (İsrail), 1/16 finalda Keli Pitersen Polandı (Böyük Britaniya) yuko xalı ilə məğlub etsə də, 1/8 finalda dünya mükafatçısı və son Avropa çempionu Sofi Özbaşla (Macarıstan) görüşdə ippona düşüb. Beləliklə, Südabə də yarışı başa vurub.