Azərbaycan Karate Federasiyasının prezidenti Ülvi Quliyev Prosport.Az saytına müsahibə verib.
– 10-12 aprel tarixlərində keçirdiyiniz ənənəvi xarakter alan Qran-pri turnirinin əsas məqsədləri və bu yarışın Azərbaycan idmanına verdiyi töhfələr nədən ibarətdir?
– Bu yarış artıq 4-cü ildir ki, keçirilirdi və ənənəvi xarakter alıb. Məqsədimiz isə gələcəkdə bu yarışın statusunu bir az da artırmaqdır. 3 gün davam edən yarışda müxtəlif yaş kateqoriyaları və çəki dərəcələri üzrə 700-ə yaxın idmançı iştirak etdi. Bu dəfə Azərbaycanla birlikdə 6 ölkə təmsil olundu. İstəyimiz odur ki, növbəti illərdə daha çox ölkə iştirak etsin.Əsas məqsədlərdən biri təcrübənin bölüşdürülməsi və mübadilə olunmasıdır. Yarış bu baxımdan çox faydalıdır. Hər zaman qeyd etdiyim kimi, vacib məqsədlərdən biri də təkcə medal qazanmaq deyil, gənclərə sağlam həyat tərzini aşılamaq, bir növ sağlam həyata çağırış etməkdir ki, Azərbaycan gəncliyi sağlam, sədaqətli, vətənpərvər olsun, fiziki, əqli və mənəvi cəhətdən güclü nəsil yetişsin. Bu istiqamətdə idmanın rolu böyükdür. Çalışırıq ki, federasiyanın işi bu istiqamətdə də genişlənsin. Gələcəkdə daha çox ölkələrin iştirakı təmin olunsun və nəinki federasiya, “Arpaçay” və digər klublarımızın da yarışları yüksək səviyyədə keçirilsin və qeyd etdiyim məqsədlərə nail ola bilək.
– Federasiyanın özünə məxsus karate zalının yaradılması ilə bağlı planlarınız varmı?
– Əlbəttə, arzumuz var ki, gələcəkdə məhz federasiyaya məxsus karate zalımız da olsun. Lakin hazırda bu, kifayət qədər böyük vəsait tələb edir. Sağ olsun dövlətimiz və dövlətimizin rəhbəri ki, yarışı keçirdiyimiz Sərhədçi İdman Mərkəzi kimi gözəl, hər cür şəraitə malik olimpiya kompleksləri yaradıb. Bizə də bu cür yarışları keçirmək qalır. Buna görə xüsusi minnətdarıq.
– Bu yarış WKF-in (Dünya Karate Federasiyası) rəsmi təqviminə salınmayıb. Turnirin rəsmi təqvimə salınması planınızda varmı?
– Düzdür, bu yarışlar WKF-in rəsmi təqvimində olmasa da, WKF qaydalarına uyğun keçirilir. Çalışırıq ki, gələcəkdə bu cür yarışlardan ən azı biri WKF-in A kateqoriyalı yarışları siyahısına daxil edilsin ki, burada daha çox ölkə iştirak etsin. Əslində bu da böyük məsuliyyət və vəsait tələb edən bir işdir. Bu barədə Gənclər və İdman Nazirliyi ilə müzakirələr aparırıq. Düşünürəm ki, gələcəkdə bu da mümkün olacaq.
– WKF təqviminə aid olan "Olimpiya Ümidləri" turniri bu il Gəncədə keçiriləcək. Ötən il isə Mingəçevirdə olmuşdu. Bu qərar regionlarda idmanın inkişafı ilə bağlıdır?
– Bəli, ötən il Mingəçevirdə keçirilmiş “Olimpiya Ümidləri” turniri bu dəfə Gəncədə keçiriləcək. Ümumiyyətlə, yarışları təkcə Bakı və Sumqayıt kimi mərkəzləşmiş şəhərlərdə keçirdikdə digər regionlarda inkişaf bir o qədər də sürətli getmir. Buna görə də yarışların coğrafiyasını genişləndirərək ölkəmizin digər bölgələrində keçirilməsini planlaşdırırıq. Düşünürəm ki, bu daha məqsədəuyğundur.
– 20-24 mayda Almaniyanın Frankfurt şəhərində keçiriləcək Avropa çempionatından gözləntiləriniz nədir?
– Bu yarışdan gözləntilərimiz olsa da, açığı, bir az çətin olacaq. Baxmayaraq ki, fevral ayında Kiprin Limassol şəhərində keçirilmiş yeniyetmə, gənclər və U-21-lərin Avropa çempionatında istədiyimiz nəticəni əldə etdik. Medal baxımından istər oğlanlar, istər qızlar, istərsə də kateqoriyalar üzrə həm qızıl, həm də gümüş medallar qazandıq. Lakin böyüklərdə hazırda vəziyyət fərqlidir. Bildiyiniz kimi, hazırda nəsil dəyişimi gedir. Rafael Ağayev kimi təcrübəli karateçimiz karyerasını başa vurub. Asiman Qurbanlı da başa vurmaq üzrədir. Bu səbəbdən qısa müddətdə ciddi uğur qazanmaq çətin olacaq. Ən azı bir olimpiya dövrü lazımdır ki, gənclər tədricən yetişsin və əvvəlki nəslin nəticələrinə yaxın uğurlar əldə edə bilsinlər.
– Karatenin olimpiya idman növü statusunu yenidən qazanması nə dərəcədə real görünür?
– Karatenin yenidən olimpiya idman növü kimi Oyunların proqramına daxil edilməsi hazırda kifayət qədər çətin məsələdir. Düşünürəm ki, Dünya Karate Federasiyası ilə Beynəlxalq Olimpiya Komitəsi (BOK) bu istiqamətdə daimi əlaqədədir və müzakirələr aparılır. Bildiyiniz kimi, ölkəmizdə keçirilən I Avropa Oyunları, IV İslam Həmrəyliyi Oyunları və III MDB Oyunları zamanı karate yarışları WKF xətti ilə keçirilib. Bunun səbəbi isə WKF-in BOK tərəfindən tanınan yeganə rəsmi karate qurumu olması və müvafiq sertifikata malik olmasıdır.
Səbuhi Musa