Azərbaycan I Liqasının XXII turunda “Mingəçevir” doğma meydanda “Difai”ni 2:1 hesabı ilə məğlub edib.

Matçdan sonra “Mingəçevir”in nigeriyalı futbolçusu Abba Usman Prosport.Az-a müsahibə verib.

– Oyunla bağlı fikirləriniz...
– Əsas olan dayanmamaq, irəli getmək və qələbə qazanmaqdır. Oyun bizim üçün çətin keçdi, amma sonda qalib gəldik. Bu qələbəyə çox sevindik.

– Azərbaycana transferiniz necə baş tutdu?
– Keçən qış bura gəldim və mövsümün yarısını burada keçirdim. Daha sonra mənə 1 illik yeni müqavilə təklif olundu və qəbul etdim. Burada olduğum üçün çox xoşbəxtəm. Həm öz oyunumdan razıyam, həm də komandanın inkişaf etdiyini görürəm. Azarkeşlər, ölkə və klub çox yaxşıdır. Komandamız ötən mövsümlə müqayisədə daha güclüdür.

– Azərbaycan futbolu haqqında düşüncələriniz necədir?
– Düşünürəm ki, Azərbaycan futbolu əvvəlkindən daha yaxşıdır. İnşallah, bir gün daha böyük klublar səviyyəsinə çatacağıq.

– Premyer Liqada çıxış edən həmyerlilərinizlə əlaqəniz varmı?
– Bəli, çoxlu tanışım və dostum var. “Qəbələ”dən Abdullah Şuaybu ilə əlaqəm var. Həmçinin “Qarabağ”da çıxış edən dostlarım da var.

Bahar Rüstəm