Azərbaycan cüdoçusu Hidayət Heydərov Gürcüstanın paytaxtı Tbilisidə keçirilən Avropa çempionatında gümüş medal qazanıb.
Prosport.Az xəbər verir ki, 73 kq çəki dərəcəsində mübarizə aparan olimpiya, dünya və Avropa çempionu finalda Gürcüstan təmsilçisi Laşa Şavdatuaşviliyə 3-cü şido xəbərdarlığı ilə uduzub.
Bununla da o, karyerasında 2-c dəfə qitə birinciliyinin gümüş medalı ilə kifayətlənib. Dördqat Avropa çempionu olan millimizin lideri həmçinin karyerası ərzində tatamiyə çıxdığı 3-cü finaldan məğlub ayrılıb.
Heydərov 1/16 finalda Konstantinos Tsaparas (Yunanıstan), 1/8 finalda Dardan Çenan (Kosovo), 1/4 finalda Deyan Bulemtafes (Fransa), yarımfinalda isə Bilal Çiloğlunu (Türkiyə) məğlub etmişdi.
Qeyd edək ki, ötən gün mübarizəyə qoşulan 7 cüdoçumuzdan 2-si - Əhməd Yusifov (60 kq) və Turan Bayramov (66 kq) bürünc medal qazanıb.
Avropa çempionatı aprelin 19-da başa çatacaq.
14:05
Azərbaycan cüdoçusu Hidayət Heydərov Gürcüstanın paytaxtı Tbilisidə keçirilən Avropa çempionatının finalına yüksəlib.
Prosport.Az-ın Tbilisiyə ezam olunan əməkdaşının məlumatına görə, 73 kq çəki dərəcəsində mübarizə aparan son olimpiya çempionumuz yarımfinalda Bilal Çiloğluya (Türkiyə) ipponla qalib gəlib.
Onun finaldakı rəqibi özü kimi olimpiya, dünya və Avropa çempionu Laşa Şavdatuaşvili (Gürcüstan) olacaq.
Qeyd edək ki, bu, Hidayət Heydərovun 6-cı Avropa çempionatının finalıdır. İdmançımız indiyədək bu finallardan 4-də qalib gəlib, 1-də uduzub.
12:51
Azərbaycan cüdoçusu Hidayət Heydərov Gürcüstanın paytaxtı Tbilisidə keçirilən Avropa çempionatının yarımfinalına yüksəlib.
Prosport.Az-ın Tbilisiyə ezam olunan əməkdaşının məlumatına görə, 73 kq çəki dərəcəsində mübarizə aparan son olimpiya çempionumuz 1/16 finalda Konstantinos Tsarapasa (Yunanıstan) ipponla, 1/8 finalda Dardan Çenaya (Kosovo) yuko ilə və 1/4 finalda Haiti əsilli Deyyan Bulemtafesə (Fransa) ipponla qalib gəlib.
Onun yarımfinaldakı rəqibi dünya və Avropa mükafatçısı Bilal Çiloğlu (Türkiyə) olacaq.
Qeyd edək ki, ötən gün mübarizəyə qoşulan 7 cüdoçumuzdan 2-si – Əhməd Yusifov (60 kq) və Turan Bayramov (66 kq) bürünc medal qazanıb. Avropa çempionatı aprelin 19-da başa çatacaq.