Azərbaycan I Liqasının XXII turunda “Mingəçevir” doğma meydanda “Difai”yə 2:1 hesabı ilə qalib gəlib.

Matçdan sonra "Difai"nin məşqçisi Aydın Qasımov Prosport.Az-a müsahibə verib:

– Oyunla bağlı fikirləriniz...
– Oyunla bağlı deyə bilərəm ki, çempionluğa oynayan favorit komandaya qarşı mübarizə apardıq. Komanda şəklində yaxşı çıxış etdik. Qol imkanlarımız oldu, lakin onlardan yararlana bilmədik. Rəqib isə şanslarını dəyərləndirdi və qələbə qazandı.

– Komanda hazırda liqada 9-cu pillədədir və aşağı liqaya düşmə təhlükəsi var. Mövsümün sonuna qədər bu vəziyyətdən çıxmaq mümkün olacaq?
– Çalışırıq ki, bu mərhələni uğurla keçək. Doğrudan da bizim üçün ağır mövsüm oldu. Bu məğlubiyyətlərdən nəticə çıxarmalıyıq. Qarşıdakı 6 oyunda maksimum xal toplamağa çalışacağıq ki, vəziyyəti yaxşılaşdıraq.

– Penalti epizodu ilə bağlı fikriniz necədir?
– Epizodu bir daha izləmək lazımdır. Bu, hakimin qərarıdır. Artıq dəyişmək üçün gecdir.

Bahar Rüstəm