"Bu gün sevincimin həddi-hüdudu yoxdur. Çox xoşbəxtəm. Düzdür, çox insan inanmırdı. Amma mənə inanan şəxsi məşqçilər və federasiya rəhbərliyi də vardı".
Prosport.Az xəbər verir ki, bunu Gürcüstanın paytaxtı Tbilisidə keçirilən Avropa Çempionatında 66 kq çəki ilə bürünc medal qazanan Turan Bayramov yarışa ezam olunmuş jurnalistlərə açıqlamasında deyib.
24 yaşlı idmançı yeni çəkidəki 3-cü yarışında əldə etdiyi nailiyyəti yüksək qiymətləndirib:
– Artıq 66 kq-da 4-cü yarışım idi. Ötən ay Tbilisidə Böyük Dəbilqədə gümüş medal qazanmışdım. Onda inamım daha da artdı. Düşündüm ki, 60 kq-da edə bilmədiklərimi 66 kq-da daha rahat edərəm. Şükürlər olsun ki, bu yarışa gələndə də hazırlığım yüksək səviyyədə oldu. Qısa vaxtda bu yarışa qatılacağımdan xəbərim oldu. Bildiyiniz kimi, digər idmançı (Ruslan Paşayevi nəzərdə tutur – red.) zədələndiyi üçün heyətə adım daxil edildi. Şükürlər olsun ki, məşqçilər məni seçdi və mən də onların etimadını doğrultdum. Düzdür, qızıl da ola bilərdi, bəzi səhvlərə yol verdim.
– Tbilisidə medalsız qaldığınız yarış olmayıb. Bu şəhərlə Aranızdakı doğmalıq nədir?
– Bu şəhəri çox sevirəm. 2022-ci ildən bəri Böyük Dəbilqə turnirlərində medallar qazanıram. Özüm gəncəliyəm. Tbilisi Bakıdansa Gəncəyə daha yaxın olduğu üçün havası, çəkidən sonra qidalanma mənə özümü yaxşı hiss etdirir. Bura mənə öz torpağımdakı doğmalığı xatırladır.
– Qızıl üçün çatışmayan bəzi çatışmazlıqlar hansı idi?
– Düşünürəm ki, öz güləşimdən kənara çıxaraq xırda səhvə yol verdim. Heç vaxt üzərində işləmədiyim fənni etməyə çalışdım, o da alınmadı. Şəxsi məşqçim də, özüm də bunu bildik. İnşallah, evə qayıtdıqdan sonra vaxtımız olacaq. Bunun üzərində işləyib qarşıdakı yarışlarda belə səhvlərə yol verməyəcəyəm.
– Murad Çopanov ilə 1/4 final görüşündə son saniyələrdə sizə xal verildi. Lakin son saniyələrdə o xal ləğv olundu...
– Düşünürəm ki, haqlı qərar idi. Mən də döyüş əsnasında qalib gəldiyimi düşünmüşdüm. Rəqib ayağını ilişdirmişdi. Sonradan baxdılar və xalımı sildilər. Yəqin ki, orada xal yox imiş ki, vermədilər. Qərarla razıyam.
– 66 kq çəki dərəcəsində Azərbaycan cüdoçularının dünya çempionatlarında medalı yoxdur. Bu il də dünya çempionatı Bakıdadır. Nə söz verə bilərsiniz?
– Söz verib elə məsuliyyəti üzərimə götürə bilmərəm. Əlimdən gələnin ən yaxşısını edəcəyəm ki, öz ölkəmizin, doğma azarkeşlərimizin önündə layiqincə çıxış edim.
– Avropa çempionatında digər çəkilərdən 2-də 2 cüdoçu çıxış edir. Ola bilərmi ki, yüksək rəqabət üzündən dünya çempionatında 66 kq çəkidə də 2 idmançı yer alsın?
– Bu, əlbəttə, məşqçilər heyətinin qərarıdır. Dünya çempionatınadək daha bir neçə yarış olacaq. O vaxta qədər kimin yaxşı formada olub-olmadığına onlar qərar verəcəklər.