"Yarışa güclü hazırlaşmışdım. Yaxşı yarış keçdi. Bütün görüşlərim çətin alındı. Buna baxmayaraq, 3-cü oldum. Ardıcıl 2-ci dəfə bürünc medal qazanıram".

Prosport.Az xəbər verir ki, bu sözləri Gürcüstanın paytaxtı Tbilisidə keçirilən böyüklər arasında Avropa çempionatında bürünc medal qazanan Azərbaycan cüdoçusu Əhməd Yusifov (60 kq) deyib.

O, bu medalın Avropa çempionatlarında əldə etdiyi ardıcıl 2-ci bürünc mükafat olduğunu söyləyib: “Hədəfim ilk gündən Avropa çempionluğu idi. Təəssüf ki, qismət olmadı. Səhvlərimiz var və bunun üzərində işləyib daha güclü olmaq lazımdır”.

İdmançı 3-cü yer uğrunda görüşdə komanda yoldaşı Balabəy Ağayev üzərində əldə etdiyi qələbəni dəyərləndirib: “Finalda da qarşılaşa bilərdik. 3-cü yer uğrunda qarşılaşdıq. İkimizdən biri qalib gəlməli idi. Onun məğlub olmağına sevinə bilmərəm. Komandada yaxşı aura olmur. Balabəyin yarımfinal görüşündə bir az ona haqsızlıq oldu. Cüdoda bəzən belə hallar olur”.

O, növbəti günlərdə çempionluq ümidlərini açıqlayıb: "Komanda yoldaşlarımdan Hidayət Heydərov, Zelim Kotsoyev və Murad Fətiyev Avropa çempionu ola bilər. Çempion olmasalar da, medal qazanacaqlarına əminəm".

Qeyd edək ki, Azərbaycan aprelin 19-dək davam edəcək mötəbər turnirdə 9 kişi və 6 qadın olmaqla 15 cüdoçu ilə təmsil olunur.