Gürcüstanın paytaxtı Tbilisidə keçirilən cüdo üzrə Avropa çempionatında Azərbaycan millisi ilk gündə 2 medal qazanıb.
Prosport.Az-ın Tbilisiyə ezam olunmuş əməkdaşının xəbərinə görə, bunlar Əhməd Yusifov və Turan Bayramovdur.
60 kq-da Əhməd Yusifov fevralda keçirilmiş Daşkənd Böyük Dəbilqə turnirinin finalında olduğu kimi, bürünc medal görüşündə də Balabəy Ağayevə qalib gəlib.
66 kq-da Turan Bayramov zədəli Ruslan Paşayevin yerinə son anda heyətə salınsa da, ümidləri doğruldub. O, bürünc medal görüşündə rusiyalı Abdullax Parçiyevdən üstün olub.
Qadınlarda 48 kq-da sensasiyaya imza ataraq bürünc medal görüşünə çıxan Şəfəq Həmidova isə komanda yoldaşı Leyla Əliyeva kimi ispaniyalı Laura Martines Abelendaya uduzub.
Beləliklə, millimiz yarışın ilk gününü 2 bürünc medalla başa vurub. Sabah saat 10:00-da başlayacaq yarışda yalnız 73 kq-da olimpiya, dünya və Avropa çempionumuz Hidayət Heydərov mübarizə aparacaq.
14:51
Gürcüstanın paytaxtı Tbilisidə keçirilən cüdo üzrə Avropa çempionatında Azərbaycan millisi çıxışını davam etdirir.
Prosport.Az-ın Tbilisiyə ezam olunmuş əməkdaşının xəbərinə görə, ilk mərhələdə 4 cüdoçumuz bürünc medal qazana bilər.
60 kq-da Balabəy Ağayev 1/4 finalda özbək əsilli ukraynalı Dilşot Xalmatovu məğlub etsə də, yarımfinalda hakimlərin şübhəli qərarı ilə yerli idmançı, dünya və son Avropa çempionu Giorgi Sardalaşviliyə uduzub.
Əhməd Yusifov isə 1/4 finalda Fransanı təmsil edən olimpiya və Avropa çempionu Luka Mxeidzeyə yenilib. Daha sonra Əhməd təsəlliverici yarışda Romen Valadye Pikara (Fransa) qalib gələrək bürünc medal görüşünə vəsiqə qazanıb. Onun bürünc medal uğrunda rəqibi Balabəy Ağayev olacaq.
66 kq-da Turan Bayramov 1/8 finalda Elios Mantsiyə (İtaliya) qalib gəlsə də, növbəti mərhələdə rusiyalı Murad Çopanova uduzub. İdmançımız təsəlliverici yarışda Radu İzvoryanuya (Moldova) qalib gələrək bürünc medal görüşünə vəsiqə əldə edib. Onun buradakı rəqibi digər rusiyalı Abdullax Parçiyev olacaq.
Qadınlarda 48 kq-da Şəfəq Həmidova sürpriz nəticəyə imza atıb. O, 1/8 finalda son dünya çempionu Assunta Skuttonu (İtaliya), 1/4 finalda İsveçi təmsil edən İran əsilli olimpiya və dünya mükafatçısı Tara Əbülfətə qalib gəlib. Bununla da o, Kifayət Qasımovadan sonra yarımfinala adlayan ilk azərbaycanlı qadın idmançımız olub. Şəfəq yalnız yarımfinalda olimpiya və dördqat Avropa çempionu Əlcəzair əsilli Fransa cüdoçusu Şirin Bukliyə uduzub. O, bürünc medal uğrunda Laura Martines Abelenda (İspaniya) ilə qarşılaşacaq.
Könül Əliyeva isə 1/8 finalda Laura Martines Abelendaya uduzaraq medalsız qalıb.
52 kq-da yarışan qadın idmançılarımızın da medal qazanmayacağı dəqiqləşib. 1/8 finalda Leyla Əliyeva ikiqat olimpiya mükafatçısı, dünya və Avropa çempionu Odett Cufridaya (İtaliya), Gültac Məmmədəliyeva isə ikiqat Avropa mükafatçısı Reka Puppa (Macarıstan) uduzaraq mübarizəni medalsız başa vurub.
Qeyd edək ki, medal yarışları saat 16:00-dan etibarən başlayacaq.
11:51
Gürcüstanın paytaxtı Tbilisidə keçirilən cüdo üzrə Avropa çempionatına Azərbaycan millisi uğurlu start verib.
Prosport.Az-ın Tbilisiyə ezam olunmuş əməkdaşının xəbərinə görə, ilk mərhələdə bütün cüdoçularımız mərhələ adlayıb.
60 kq-da çempionluğa favorit olan, yarışın 1 nömrəsi sayılan Balabəy Ağayev 1/4 finala adlayıb. O, italiyalı Andrea Karlinoya qalib gəlib.
Həmin çəkidə Əhməd Yusifov Çarli Eyrə (Böyük Britaniya) qalib gələrək 1/4 finala çıxıb.
66 kq-da Turan Bayramov 1/16 finalda Nikolas Kuntseyə (Almaniya) qalib gəlib.
Qadınlarımız da ilk mərhələni – 1/16 finalı uğurla adlayıb. 48 kq-da Şəfəq Həmidova Erza Muminoviçə (Kosovo), Könül Əliyeva Amber Xersyesdən üstün olub.
52 kq-da Leyla Əliyevanın serbiyalı rəqibi Nikolina Nişaviçin tatamiyə çıxmayacağını bildirmişdik. Gültac Məmmədəliyeva isə lüksemburqlu Karla Tavares Fernandesi məğlub edib.