AFFA U-16 Liqasının II mərhələsinin XI turunda “Qarabağ” doğma meydanda “Turan Tovuz”u 4:0 hesabı ilə darmadağın edib.

Matçdan sonra "Qarabağ"ın baş məşqçisi Rauf Əliyev Prosport.Az-a müsahibə verib.

– Rəqibə böyük hesabla qalib gəldiniz. Oyunla bağlı fikirlərinizi öyrənək...
– Maraqlı oyun alındı. Daha əvvəl də “Turan Tovuz”la qarşılaşmışdıq və rəqibi yaxşı tanıyırdıq. Uşaqlardan çox razıyam. Rəqib əsasən müdafiədə oynayırdı, lakin bizim üçün vacib olan müdafiəni yarmaq və epizodlardan maksimum yararlanmaq idi. Bunu bacardıq. Qarşıda hələ 3 tur var, növbəti oyunlara hazırlaşacağıq.

– Turnir cədvəlində yalnız “Sabah”dan geri qalırsınız. Mövsümün sonunda çempion olmaq şansınızı necə dəyərləndirirsiniz?
– Açığı, çox şansımız qalmayıb. “Sabah”ın xal itirməsini gözləməliyik. Amma bizim üçün əsas məqsəd nəticə yox, futbolçu yetişdirməkdir. Gələcəkdə bu heyətdən 3-4 futbolçunu Premyer Liqada görsək, bu bizim üçün daha sevindirici olar. 16-17 yaşlı futbolçular üçün nəticə o qədər də önəmli deyil.

– Hazırkı heyətdə U-20 dünya çempionatının milli komandada çıxış edə biləcək futbolçular varmı?
– Milli komandaya ən çox futbolçu verən klublardan biriyik. Bəzən 10-12 futbolçumuz milliyə dəvət alıb. Qarşıda turnirlər var, o cümlədən Qazaxıstanda keçiriləcək yarış. Düşünürəm ki, yenə də milliyə dəvət alan futbolçularımız olacaq.

– Növbəti oyun “Neftçi”yə qarşı olacaq. Bu matçdan gözləntiləriniz nədir?
– “Neftçi” yaxşı komandadır. İlk oyunda 1:0 hesablı qələbə qazanmışdıq. Bu dəfə səfərdə oynayacağıq və bizi çətin matç gözləyir. Rəqib keyfiyyətli futbolçulardan ibarətdir. Hazırlaşırıq və ümid edirəm ki, qalib gələn tərəf biz olarıq.

Bahar Rüstəm