Azərbaycan təmsilçiləri Portuqaliyanın Portimao şəhərində keçirilən batut gimnastikası və tamblinq üzrə Avropa çempionatını 2 medalla başa vurub.

Prosport.Az xəbər verir ki, tamblinq üzrə komandamız final mərhələsində yüksək nəticə göstərərək gümüş medal qazanıb. Fərdi proqramda isə Tofiq Əliyev 29.300 xalla Avropa 2-cisi olub. Bu nəticə onun Avropa çempionatlarında ardıcıl olaraq qazandığı 2-ci gümüş medaldır.

Batut gimnastikası üzrə fərdi proqramda Selcan Mahsudova çempionatı 56.550 xalla 4-cü, Maqsud Mahsudov isə 60.080 xalla 6-cı pillədə tamamlayıb.

Komanda yarışlarında isə böyüklərdən ibarət kollektiv finalda 4-cü yeri tutub.

Qeyd edək ki, ölkəmiz bu mötəbər yarışda gənclər və böyüklər yaş kateqoriyalarında ümumilikdə 23 gimnastla təmsil olunub.