AFFA Gənclər Liqasının (U-19) II mərhələsinin IV turunda “Qarabağ” doğma meydanda “Qəbələ”ni məğlub edib – 2:1.
Matçdan sonra Ağdam klubunun baş məşqçisi Rəşad Sadiqov Prosport.Az-a müsahibə verib.
– II mərhələdə məğlubedilməzliyiniz davam edir. Oyunla bağlı fikirləriniz necədir? Bu mövsüm “Qəbələ” ilə matçlarda artıq 2 qələbə və 1 məğlubiyyətiniz var...
– Düzünü desəm, əvvəlki oyunlar fərqli idi. Çünki rotasiya edirdik, bütün oyunçulara şans verirdik. Yəqin ki, rəqib də eyni cür edirdi. Bu dəfə isə “Qəbələ” əsas heyətlə çıxmışdı. Bu oyun "6-lıq" mərhələyə aid idi və burada xal itirmək bizim üçün ağır ola bilərdi. Buna baxmayaraq, rəqib həqiqətən yaxşı və "dişli" idi. Belə komandalara qarşı oynamaq həm çətin, həm də zövqlüdür. Şükürlər olsun ki, qələbə qazandıq. Ağır oyun olsa da, istəyimizə çatdıq. Çalışacağıq ki, bu il çempion olaq.
– U-20 milli komandasının toplanışı komandaya nə dərəcədə təsir edəcək?
– Bu hal hər il olur. Komandamızda 2008-ci il təvəllüdlü futbolçular çoxdur və hər il 5-6 nəfər toplanışa dəvət alır. Qayıdanda isə daha formada olurlar və biz də işimizi davam etdiririk. Çalışırıq ki, belə məqamlara mənfi yox, müsbət yanaşaq. Hər kəs istəyər ki, futbolçusu milliyə dəvət alsın. Mən də çalışıram ki, daha çox oyunçumuz ora getsin. Bu dəfə bizdən 7-8 nəfərin çağırılması sevindiricidir.
– Çağırılmasını gözlədiyiniz, amma dəvət almayan futbolçu varmı?
– Açığı, bu seçim bizlik deyil. Qərarı milli komandanın məşqçiləri verir. Baş məşqçi portuqaliyalıdır və yəqin ki, oyunları izləyir. Ola bilər ki, kimlərisə gözləmişəm, amma çağırılmayıb, ya da əksinə. Bu mənim səlahiyyətimdə deyil. Mənim işim futbolçuları adından asılı olmayaraq hazır vəziyyətə gətirməkdir.
– 2 həftəlik fasilədə yoldaşlıq oyunu nəzərdə tutulub?
– Çalışacağıq ki, oyun keçirək. Sadəcə, uyğun rəqib tapmaq lazımdır. Fasilə qərarı bir qədər gözlənilmədən verildi, son 2-3 gündə məlumat aldıq. Yəqin ki, digər komandalarda da istirahət olacaq. Əgər II Liqa və ya I Liqa oyunları olmasa, ehtiyat heyətlərlə və ya U-19 komandaları ilə qarşılaşma təşkil etməyi planlaşdırırıq. Məqsədimiz "dişli" rəqiblərlə oynamaqdır ki, komanda təzyiqə öyrəşsin.
Bahar Rüstəm