AFFA Gənclər Liqasının (U-19) II mərhələsinin IV turunda “Qarabağ” doğma meydanda “Qəbələ”ni məğlub edib – 2:1.

Matçdan sonra “Qəbələ”nin baş məşqçisi Famil Xəlilov Prosport.Az-a müsahibə verib.

– Oyun haqqında fikirlərinizi bölüşərdiniz...
– Öncə “Qarabağ”ı təbrik edirəm. Layiqli qələbə qazandılar. Buna baxmayaraq, öz futbolçularımla fəxr edirəm, onları da təbrik edirəm. Oyuna çox yaxşı hazırlaşmışdılar və layiqli mübarizə apardılar. Kifayət qədər qol şanslarımız var idi. Sadəcə, bir qədər həyəcan qol epizodlarını dəyərləndirməyə imkan vermədi. Təbii ki, futboldur, hələ heç nə bitməyib. Qarşıda 6 tur var və hər şey dəyişə bilər. Mübarizəni sona qədər davam etdirəcəyik.

– “Qarabağ”la bu mövsüm əvvəlki oyunlarda 1 qələbə və 1 məğlubiyyətiniz var idi. Bu amil oyuna nə qədər təsir etdi?
– Bəli, “Qarabağ”la əvvəlki 2 oyunumuzda 1 qələbə və 1 məğlubiyyət olmuşdu. Ona görə də bu qarşılaşma hər iki tərəf üçün prinsipial xarakter daşıyırdı. Evdə hələ 1 oyunumuz var.

– Qəbələdə bu rəqibə 3:0 qalib gəlmişdiniz. Yenidən öz meydanınızda belə qələbəni təkrarlamaq mümkündürmü?
– Bu, futboldur, hər şey ola bilər. Bu dəfəki qədər qol imkanları yarada bilsək, niyə də yox? Yenə də “Qarabağ”ı təbrik edirəm. Çox yaxşı komandadır. U-19 komandaları arasında ən yaxşı oyunçulara malik kollektivlərdən biridir və layiqli qələbə qazandılar.

– U-20 milli komandanın təlim-məşq toplanışı ilə əlaqədar yaranacaq fasilə oyunçuların performansına necə təsir edəcək?
– Təbii ki, komandalar hazırda formada idi. Milli komanda səbəbindən oyunlar sıx qrafiklə – 3 gündən bir keçirilirdi. Bu fasilə bir tərəfdən futbolçulara həm fiziki, həm də psixoloji baxımdan istirahət imkanı verəcək. Digər tərəfdən isə komandanı yenidən kökləmək müəyyən çətinlik yarada bilər. Amma bu bizim işimizdir.

Bahar Rüstəm