Portuqaliyanın Portimau şəhərində keçirilən batut gimnastikası və tamblinq üzrə Avropa çempionatı ölkəmiz üçün uğurlu keçir.

Prosport.Az xəbər verir ki, bu mötəbər yarışda gənclər və böyüklər yaş kateqoriyasında ümumilikdə 23 gimnastla təmsil olunan batut millimiz təsnifat mərhələsinin nəticələrinə əsasən finala yüksəlib. 

Belə ki, Selcan Mahsudova, Maqsud Mahsudov, Nicat Mirzəyev, Hüseyn Abbasov, Ammar Baxşalıyev və Fərhad Mustafayev fərdi proqramda yarımfinal və final mərhələlərinə çıxıb.

Komanda yarışlarında isə gənclər arasında Fərhad Mustafayev, Ömər Qasımlı, Muhamməd Həsənli və Ammar Baxşalıyev, böyüklər arasında isə Maqsud Mahsudov, Hüseyn Abbasov, Əli Niftəliyev və Mehdi Əliyev uğurlu çıxışları ilə finala vəsiqə qazanıb. Final mərhələsində böyüklərdən ibarət komanda 4-cü pillədə qərarlaşıb.

Sinxron proqramlarda da gimnastlarımız yüksək nəticələr göstərib. Kişilər arasında Ammar Baxşalıyev – Fərhad Mustafayev və Maqsud Mahsudov – Hüseyn Abbasov cütlükləri, qarışıq sinxronda isə Ayan Şabanova və İbrahim Mustafazadə növbəti mərhələlərə yüksəlib.

İkili-mini batut üzrə Ammar Baxşalıyev, Ömər Qasımlı, Muhamməd Həsənli və Nikita Koleşnikov komanda hesabında finala vəsiqə qazanıb. Ammar Baxşalıyev fərdi proqramda da final mərhələsində mübarizə aparacaq.

Bu çempionat Azərbaycan gimnastikası tarixində yeni bir səhifə açır: gimnastlarımız ilk dəfə olaraq həm gənclər, həm də böyüklər yaş kateqoriyalarında batut gimnastikası üzrə komanda hesabında, eləcə də ikili-mini batut üzrə gənclər arasında finala yüksəlməyi bacarır.

Tamblinq üzrə də uğurlar davam edir. Mixail Malkin, Tofiq Əliyev, Adil Hacızadə və Aleksey Karataşov komanda hesabında finala vəsiqə qazanıb. Mixail Malkin və Tofiq Əliyev fərdi proqramda da final mərhələsində yer alıb. Final çıxışında isə komandamız gümüş medal qazanaraq bayrağımızı zirvəyə bir addım daha yaxınlaşdırıb.

Qeyd edək ki, yarışlara bu gün yekun vurulacaq.