İspaniyanın Vuelba şəhərində keçirilən badminton üzrə Avropa çempionatında legioner idmançılarımız uğursuz çıxış edib.

Prosport.Az-ın xəbərinə görə, yarışda Azərbaycanı 3 legioner (2 kişi, 1 qadın) badmintonçu təmsil edib.

Bunlar millimizin indoneziyalı legionerləridir. Belə ki, kişilərdə Ade Reski Dviçahyo 1/16 finalda İrlandiyanı təmsil edən vyetnamlı Nhat Nquyenə 0:2 (8:21, 20:22) uduzub.

Həmçinin, Diki Dvi Panyestu da ilk mərhələdə Dimitar Yanakiyevə 2:1 (19:21, 21:16, 21:14) qalib gəlsə də, 1/16 finalda Avstriyanı təmsil edən rumıniyalı Kolins Valentine Filimona 0:2 (15:21, 19:21) uduzaraq mübarizəni dayandırıb.

Qadınlarda isə Keysa Fatimah Azzahra 1/16 finalda danimarkalı Avropa çempionu və 2015-ci ildə Bakıda keçirilmiş I Avropa Oyunlarının qalibi Line Kesfeldtə 0:2 (11:21, 12:21) uduzub. Kesfeldt bu gün finalda mübarizə aparacaq.

Qeyd edək ki, qoşa kişilər və qarışıq cütlərdə Azərbaycan təmsilçiləri yarışmayıb.