AFFA U-15 Liqasının II mərhələsinin VII turunda lider “Neftçi” doğma meydanda “Qarabağ”ı 4:1 məğlub edib.

Matçdan sonra “Neftçi”nin (U-15) baş məşqçisi Eldəniz Məmmədov Prosport.Az-a müsahibə verib.

– Oyun haqqında fikirlərinizi bölüşərdiniz...
– Ümumiyyətlə, “Qarabağ”la oyunlarımız çox maraqlı keçir. İlk matçda 2:1 hesabı ilə qələbə qazanmışdıq. Hazırda 6 oyunda 6 qələbəmiz var. Uşaqları motivasiya etmişdik ki, bu matçda da çempionluğu təmin edək. Son 3 oyunda 1 xal qazanmağımız kifayətdir. Komanda yaxşı hazırlaşmışdı, bütün uşaqları təbrik edirəm. 2-ci hissədə meydana daxil olan oyunçular da verilən tapşırıqları yerinə yetirdi. Meydanda istədiyimiz oyunu gördük. “Qarabağ” komandasını da təbrik edirəm. Yaxşı futbolçulardan ibarət, maraqlı oyun sərgiləyən komandadır.

– Oyunda hər iki komandanın futbolçusu qırmızı vərəqə aldı. Bu epizod nə ilə bağlı idi?
– Epizoda baxdıq. Rəqib komandanın futbolçusu cərimə meydançasında bizim oyunçunu tutmuşdu. Bizim futbolçu da buna reaksiya verdi. Belə hallar futbolda olur. Sonradan onları barışdırdıq.

– Oyundan sonra ehtiyat skamyalar arasında da mübahisə yaşandı. Buna səbəb nə idi?
– “Qarabağ”dan bir futbolçu bizim oyunçuya nəsə demişdi. Yüngül bir insident yaşandı. Onu da aradan qaldırdıq, tərəfləri barışdırdıq.

– Son 3 oyunda komandanın nə qədər xal toplamaq potensialı var?
– Son 3 oyunda 1 xal toplamağımız çempionluğu rəsmiləşdirmək üçün kifayətdir. Akademiyada müəyyən strategiyamız var. Potensiallı futbolçular yuxarı yaş qruplarında çıxış edir. Daha bir neçə oyunçu da həmin qruplara göndəriləcək. Eyni zamanda aşağı yaş qruplarından da futbolçular cəlb edəcəyik. Bundan sonra az oynayanlara da şans verəcəyik. Görək nəticə necə olacaq.

– Gələn il Azərbaycanda keçiriləcək U-20 dünya çempionatı ilə bağlı fikirləriniz necədir? Hazırkı heyətdə bu turnirdə iştirak edə biləcək futbolçular varmı?
– Mənim fikrimcə, var. Hazırda komandamızda 4-5 futbolçunun əsas komandada çıxış edə biləcək potensialı mövcuddur. Rəhbərlik və koordinatorlar da bu barədə məlumatlıdır. Həmin futbolçularla əlavə işlər aparılır, onları hazırlayırıq. Çox istərdik ki, bizim futbolçular milli komandada çıxış etsin. Əsas odur ki, Azərbaycan qalib gəlsin, ölkəmiz üçün xeyirli olsun.

Bahar Rüstəm