AFFA U-15 Liqasının II mərhələsinin VII turunda A Liqasının lideri "Neftçi" doğma meydanda "Qarabağ"ı 4:1 məğlub edib.

Matçdan sonra "Qarabağ"ın (U-15) baş məşqçisi Samir Musayev Prosport.Az-a qarşılaşma ilə bağlı fikirlərini bölüşüb:

– Bu, uşaq çempionatıdır. Bizim işimiz futbolçu yetişdirməkdir. Ən azından "Qarabağ" üçün nəticə önəmli deyil. Əsas məqsəd bu uşaqların içindən böyük futbol üçün oyunçular yetişdirməkdir. Ötən mövsüm çempion olmuşuq, bu il ola bilmədik. Bu da bizim üçün vacib deyil. Əsas odur ki, futbolçularımızı A komanda üçün yetişdirək.

– Sizcə, bu mövsüm çempionluq şansınız qalıb?
– Xeyr, bu mövsüm çempionluqdan danışmırıq. Demək olar ki, şansımız yoxdur. Bizim üçün əsas olan, nəticədən asılı olmayaraq, öz oyunumuzu oynamaqdır. Öyrətdiyimiz futbolu meydanda futbolçulardan görmək istəyirik.

– Oyunda 2 qırmızı vərəqə oldu. Futbolçular arasında mübahisə nə ilə bağlı idi?
– Uşaqlardır, bir-birlərinə söz deyir, bəzən emosiyalara qapılıb əl-qol atırlar. Bununla bağlı tədbir görəcəyik. Uşaq futbolunda belə hallar olur. Bu, oyunun gərginliyi və futbolçuların emosiyaları ilə bağlıdır. Ona görə də normal qarşılayırıq.

– Futbolçu meydanı tərk edəndə ehtiyat skamyası ilə arasında da gərginlik yaşandı. Nə baş verdi?
– Nə baş veribsə, meydanda qalır. Kim nə dedi, nə demədi — bunlar oyunun içində olur. Bir-birlərinə söz atdılar. Meydandan çıxdıqdan sonra isə hər şey unudulur.

– Gələn il Azərbaycanda U-20 dünya çempionatı keçiriləcək. Hazırkı heyətdə həmin turnirdə oynamaq potensialı olan futbolçular varmı?
– Dünya çempionatında oynamaq üçün futbolçuların təxminən 20 yaşı olmalıdır. Həmin oyunçular ən azı son 4-5 ildə Premyer Liqada çıxış etməlidirlər. Belə futbolçular çox azdır — cəmi 3-4 nəfər. Ona görə də bu bizim üçün çətin olacaq. Bu müddət ərzində futbolçular üzərində işləyib onları turnirə hazır vəziyyətə gətirməyə çalışacağıq. Beynəlxalq təcrübə qazanmaq üçün daha çox oyun keçirməlidirlər.

Bahar Rüstəm