Azərbaycan Velosiped İdmanı Federasiyasının (AzVİF) baş katibi Elnarə Musayeva iş yerini dəyişib.

Prosport.Az-ın xəbərinə görə, o bu aydan AzVİF-i tərk edib.

Onun yeni işi isə Dövlət Sərhəd Xidmətinin rəisi, general Elçin Quliyevin prezidenti olduğu Azərbaycan Respublikası Atçılıq Federasiyasındadır (ARAF). Belə ki, Musayeva burada yarışların təşkili sahəsinə cavabdehlik daşıyır.

Qeyd edək ki, Elnarə Musayeva 2022-ci ilin yanvarın 14-də Mədət Quliyevin prezident olduğu dövrdə AzVİF-ə baş katib təyin olunmuşdu. Ötən ilin mayın 2-də Zaur Axundov (keçmiş AZAL futbol klubunun prezidenti) bu federasiyaya prezident seçilib. Daha sonra isə məlum olub ki, Heydər Əliyev adına İdman Konsert Kompleksinin direktoru Fikrət Hüseynov (keçmiş AZAL futbol klubunun vitse-prezidenti) həm də icraçı vitse-prezidentdir. Bu isə o demək idi ki, baş katib funksiyasını da F.Hüseynov icra edəcəkdi. Bu səbəbdən də gec-tez E.Musayevanın bu postunu itirəcəyi gözlənilən idi.