Azərbaycan I Liqasının XXI turunda nominal ev sahibi "Şimal" doğma meydanda "Mingəçevir"i qəbul edib. 

Prosport.Az-ın Şamaxıya ezam etdiyi müxbirinin verdiyi məlumata görə, Şamaxı Olimpiya Mərkəzində baş tutan matç qonaqların 3:0 hesablı qələbəsi ilə başa çatıb.

Matçda 1 qolla yadda qalan "Mingəçevir"in zambiyalı hücumçusu Kennet Kalunqa suallarımızı cavablandırıb.

– Oyunla bağlı fikirləriniz necədir?
– Yaxşı oyun oldu. Bu liqada asan qarşılaşma yoxdur. Amma mübarizə apardıq və qələbə qazandıq.

– Bombardirlər siyahısında 10 qolla 2-ci yerə yüksəldiniz. Bu barədə nə deyə bilərsiniz?
– Qol vurmaq komanda üçün vacibdir. Bombardirlər siyahısında yerimi qoruyub saxlamaq üçün əlimdən gələni edəcəyəm.

– Adınız qışda “Qəbələ” və “Kəpəz” klubları ilə hallanırdı. Bu barədə bilirdiniz?
– Xeyr, bu barədə heç nə eşitməmişəm. Sadəcə, öz komandama fokuslanmışam.

– Bu mövsüm “Mingəçevir”də əsas hədəfləriniz nələrdir?
– Əsas hədəf Premyer Liqaya yüksəlməkdir. Bunun üçün hər gün mübarizə aparırıq. Addım-addım məqsədimizə doğru irəliləyirik. Sonda nə olacağını birlikdə görəcəyik.

Bahar Rüstəm