Azərbaycan I liqasının XXI turunda nominal ev sahibi "Şimal" doğma meydanda "Mingəçevir"i qəbul edib.
Prosport.Az-ın Şamaxıya ezam etdiyi müxbirinin verdiyi məlumata görə, Şamaxı Olimpiya Mərkəzində baş tutan matç nominal qonaqların 3:0 hesablı qələbəsi ilə başa çatıb.
Matçdan sonra qarşılaşmada 2 qolla yadda qalan Bahadur Həziyev fikirlərini bölüşüb:
– Oyun çox templi keçdi. 2 hissə arasında müəyyən fərq var idi. İlk hissədə tez qol vurmaq istəyirdik, lakin "Şimal" yaxşı müdafiə olunurdu. 2-ci hissədə isə oyun istədiyimiz kimi alındı. Qollar vurduq və qələbə qazandıq. Komanda yoldaşlarımı təbrik edirəm.
– İlk hissədə meydana daxil olmağınız sizin üçün də sürpriz oldu?
– Baş məşqçi oyunun tempinə uyğun olaraq əvəzetmə qərarı verdi. Abba Usman zədəli idi, onun yerinə daxil oldum. Məqsəd hücumu gücləndirmək idi. Sağ olsun, baş məşqçi mənə şans verdi, qollarımızı vurduq və qələbə qazandıq.
– Vurduğunuz 2 qol “Mingəçevir”də ilk dublunuz oldu...
– Bəli, “Mingəçevir”də ilk dublumdur. Buna görə çox sevincliyəm. Əsas odur ki, komanda qalib gəldi. Şəxsi performansıma görə də sevinirəm. İnşallah, gələcəkdə het-trik də edərəm.
– Qış fasiləsində “Səbail”dən “Mingəçevir”ə keçidiniz necə baş tutdu?
– Adil Şükürov komandaya gələndə mən “Səbail”də çıxış edirdim. Onun rəhbərliyi altında 3 oyun keçirdim, 2 məhsuldar ötürmə və 1 qolum oldu. Sonra klubdan yollarımızı ayırmaqla bağlı xəbər gəldi. Mən də buna hörmətlə yanaşdım. Daha sonra “Mingəçevir”dən təklif aldım və bunu dəyərləndirdim.
– “Səbail”ə qarşı oyunlarda xüsusi prinsipiallıq var?
– Prinsipiallıq deyəndə ki, futbolçuyuq. İnsan istəyir ki, özünü yaxşı tərəfdən göstərsin və sübut etsin ki, yolların ayrılması düzgün qərar olmayıb. Əgər zəif oynasaydım, nə qollar vurardım, nə də assist edərdim. İnşallah, qollarımı vurub hamıya zəif olmadığımı sübut edəcəyəm.
– Daha əvvəl Ramiz Məmmədovun “Şamaxı”da İdarə Heyətinin sədr müavini işləməsi transferinizə nə dərəcədə təsir etdi?
– Mən “Şamaxı”da oynayanda baş məşqçi Cavid Hüseynov idi, Ramiz Məmmədov isə rəhbər vəzifədə çalışırdı. O vaxtdan məni tanıyırdı. Sonradan təklif göndərdi, mən də dəyərləndirdim.
Bahar Rüstəm