Azərbaycan I liqasının XXI turunda nominal ev sahibi "Şimal" doğma meydanda "Mingəçevir"i qəbul edib. 

Prosport.Az-ın Şamaxıya ezam etdiyi müxbirinin verdiyi məlumata görə, Şamaxı Olimpiya Mərkəzində baş tutan matç qonaqların 3:0 hesablı qələbəsi ilə başa çatıb.

Matçdan sonra "Mingəçevir"in baş məşqçisi Ramiz Məmmədov oyunla bağlı fikirlərini bölüşüb.

– İlk hissədə autsayderə qol vura bilməsəniz də, 2-ci yarıda 3 dəfə rəqib qapısına yol tapdınız..
– Uşaqları təbrik edirəm. Qarşımıza qoyduğumuz hədəfə çatdıq və qələbə qazandıq. “Şimal” turnir cədvəlinin sonunda olmasına baxmayaraq, çox yaxşı komandadır. 1-ci hissədə də yaxşı oyun nümayiş etdirdilər. Oyuna etdiyimiz dəyişikliklər matçın taleyini həll etdi.

– Oyuna 40-cı dəqiqədə buraxdığınız Bahadur Həziyev dubl etdi. İlk hissədə edilən 2 əvəzetmə nə ilə bağlı idi?
– Oyunun gedişatına uyğun olaraq bu, taktiki qərar idi.

– Turnir cədvəlində 3-cü pilləyə qalxdınız. Ən yaxın rəqibiniz olan “Baku Sportinq”lə aranızda cəmi 1 xal fərq var. Lakin lider "Şəfa" ilə xal fərqi 9 olaraq qalır. Bu, motivasiyaya nə qədər təsir edir?
– Biz yalnız 1-ci yerə fokuslanmışıq. Xal fərqinin nə qədər olmasından asılı olmayaraq, lider komanda ilə özümüzü müqayisə edirik.

– Şamaxı sizin üçün doğma yerdir. Bu şəhərin klubunda uzun müddət İdarə Heyətinin sədr müavini və baş məşqçi kimi işləmisiniz. Bu mövsüm Şamaxıda uduzmamısınız. Bura gələndə özünüzü daha rahat hiss edirsiniz?
– 3 il “Şamaxı”da işləmişəm. Həm azarkeşlərlə, həm də rəhbərliklə yaxşı münasibətlərim var. Bakıya gedib-gələndə Şamaxıdan keçirəm və həmin insanlarla daim görüşürəm. Ümumiyyətlə, Azərbaycandakı bütün klublar mənə doğmadır. Sadəcə, işlədiyim klublar bir az daha yaxındır. O cümlədən Tovuz və Şamaxı. Azərbaycanın bütün guşələrini sevirəm.

Səbuhi Musa