4–5 aprel tarixlərində Gəncə şəhərində keçirilən cüdo üzrə Avropa Kuboku turniri hakimlik baxımından da diqqət çəkən yarışlardan biri kimi yadda qalıb.

Prosport.Az xəbər verir ki, bu turnirdə Azərbaycanın 4 gənc hakimi ilk dəfə olaraq belə səviyyəli beynəlxalq yarışa təyinat alıb və onların fəaliyyəti prinsipial şəkildə qiymətləndirilib.

ACF-in hakimlər üzrə meneceri, “A” kateqoriyalı beynəlxalq dərəcəli referi Mətin Rəhimli ədalət təmsilçilərinin performanı barədə fikirlərini bölüşüb: "Bu hakimlər - Əzizə Cəfərova, İslam Nəcəfquliyev, Sadiq Qurbanlı və Vilayət Rəhimli — yarış prosesində qaydaların tətbiqinə ciddi yanaşma nümayiş etdirdilər. İdarə etdikləri görüşlər zamanı düzgün mövqey seçərək epizodları dəqiq qiymətləndirmələri  xüsusilə diqqətə çarpırdı.

Qeyd olunmalıdır ki, adıçəkilən gənc hakimlər təsadüfi seçilməmişdi. Bu hakimlər onlarla namizəd arasından seçilərək uzun müddət davam edən hazırlıq prosesindən keçib, nəzəri və praktiki baxımdan ciddi şəkildə hazırlanıblar. Bu hazırlıq onların yarış zamanı daha inamlı və sabit fəaliyyət göstərməsində özünü aydın şəkildə göstərdi.

Onu da qeyd etməliyəm ki, beynəlxalq səviyyəli yarışlarda hakimlik yalnız texniki biliklərlə məhdudlaşmır. Burada əsas meyarlar düzgün mövqe seçimi, epizodu əvvəlcədən hiss etmə, vaxtında və qəti qərarvermə, eləcə də yarışın ritminin qorunmasıdır. Bu baxımdan, adıçəkilən hakimlərin çıxışı qənaətbəxş hesab oluna bilər.

Xüsusilə qeyd etməliyəm  ki, belə turnirlər gənc hakimlərin inkişafı və beynəlxalq təcrübə qazanması üçün mühüm imkan yaradır. Bu cür sınaqlar onların gələcəkdə daha məsuliyyətli təyinatlara hazırlanmasında əsas mərhələlərdən biridir.

Ümumilikdə, bu debüt çıxışı göstərdi ki, gənc hakimlər potensiala malikdir və düzgün istiqamətdə işlədikləri təqdirdə, beynəlxalq hakimlik sistemində öz yerlərini tuta bilərlər".