"Səbail"in futbolçusu Roman Hüseynovun Prosport.Az-a müsahibəsi
– Komandanız son turda əsas rəqiblərindən biri olan “Baku Sportinq” üzərində 1:0 hesablı qələbə qazandı. Oyun haqqında nə deyə bilərsiniz?
– Bu oyun çox vacib idi və çox şükür ki, 3 xalı qazandıq. Çox çətin və maraqlı qarşılaşma keçdi. Həm mübarizə baxımından, həm də oyundakı epizodlara görə maraqlı görüş alındı.
– Hazırda 3 komanda Premyer Liqaya çıxmaq uğrunda mübarizə aparır. Şansları necə qiymətləndirirsiniz?
– Qarşıda hələ oyunlarımız var və hər şey özümüzdən asılıdır. Hər kəs öz şansını özü yaradır. İnşallah, istəyimizə nail olarıq və Premyer Liqaya vəsiqə qazanarıq.
– Mingəçevir futbolunun yetirməsisiniz. Eyni zamanda uşaqlıq və inkişaf dövrünüz “Qəbələ” klubunun akademiyası ilə bağlıdır. Doğma yurdunuzun komandasına qarşı oynamaq sizin üçün hansı hissləri yaşatdı?
– Bəli, mən Mingəçevirdə doğulmuşam, bu, mənim doğma şəhərimdir. Futbolla ilk dəfə orada tanış olmuşam və oynamağa orada başlamışam. Daha sonra uzun illər “Qəbələ” Futbol Akademiyasında olmuşam. “Qəbələ” mənim futbolçu kimi yetişməyimdə və inkişafımda əsas rol oynayıb. Həm Mingəçevir, həm də “Qəbələ” mənim üçün doğmadır.
– 2022-ci ilin yayından 2023/24 mövsümünün qış fasiləsinədək "Mingəçevir"də oynamısınız. Bu klubdan təklif almışdınız?
– Bəli, qışda təklif olmuşdu.
– Yəqin ki, maliyyə məsələsinə görə razılıq əldə olunmayıb...
– Mingəçevir mənim doğma şəhərimdir. Ona görə də bu haqda danışmaq istəmirəm.
– Qış fasiləsində Premyer Liqa klublarından təkliflər almısınızmı?
– Xeyr, qışda Premyer Liqa klublarından təklif almamışdım.
– Hazırda 28 yaşınız var. Azərbaycan millisindən dəvət almaq şansınızı necə dəyərləndirirsiniz?
– Həyatda hər şey mümkündür. Millidə oynamaq hər bir futbolçunun arzusudur. Amma I Liqadan milliyə dəvət almaq çətin məsələdir.
– Növbəti oyununuz lider "Şəfa"ya qarşıdır. Onlar da son turda doğma yurdunuzun komandasına məğlub oldu. Qarşıdakı görüş haqqında fikirlərinizi alardıq...
– Oyunu çətin keçəcəyi bəllidir. Rəqibin son matçda məğlub olması bu görüşə təsir etməyəcək. I Liqada qarşılaşmalar çox çətin keçir. Daha ciddi hazırlaşıb, mübarizə aparmalıyıq.
Mahmud