"Şəki" Azərbaycan Basketbol Liqasının pley-in mərhələsinin 2-ci oyununda "Quba"nı 120:77 hesabı ilə məğlub edərək pley-offa yüksəlib.

Prosport.Az xəbər verir ki, hər iki komandanın baş məşqçisi görüşlə bağlı fikirlərini bölüşüb.

Bedri Meriç ("Şəki"): "Rəqibimizi pley-ində göstərdiyi mübarizəyə görə təbrik edirik. Biz ilboyu bu zaman üçün hazırlanmışdıq. Mövsümün əvvəlindən hədəfimiz pley-off idi. Çempionata başlayarkən 45 gün başqa şəhərdə məşqlərimizi keçdik, mövsüm ərzində çox problemlərlə üzləşdik, bəxtsiz şəkildə oyunlar uduzduq. A qrupunda çox sərt komandalarla oynadıq. Bəlkə onlara uduzduq, ancaq heç vaxt məqsəd və xarakterimizdən vaz keçmədik. 

Bu gün də bu xarakterlə mübarizə aparan bütün oyunçularımla qürur duyuram. “Şəki” növbəti mövsümdəki yeni formatda da Yüksək Liqada mübarizə aparacaq. Ən böyük xoşbəxtlyim ona görədir ki, ötən mövsümkü uğurumuz müvəqqəti olmadı, istiqrar göstərib “Şəki”ni yuxarıda saxladıq. Bunun üçün dəstək olan bütün heyətimizə xüsusi təşəkkür etmək istəyirəm".

Şəhriyar Əsgərov ("Quba"): "Bizim üçün çempionat sanki "Naxçıvan"la oyunda bitmişdi. Həmin görüşdə qalib gəlsəydik, hər şey tamam başqa cür olardı. "Şəki" yaxşı komandadır, 7 legionerə qarşı oynamaq olduqca çətindir. Basketbolçularıma təşəkkür edirəm. Yarışı təşkil edən hər kəsə minnətdaram, oyunçulardan tutmuş hakimlərə qədər hamıya təşəkkürümü bildirirəm. Biz də əlimizdən gələnin ən yaxşısını etməyə çalışdıq. Təəssüf ki, uğurlu nəticə qazanmaq qismət olmadı. İstəyirdik ki, "səkkizliy"ə düşək. Biz boyumuzdan hündürə tullana bilmərik, bunu bacarmadıq da. "Şəki" oyuna çox yaxşı hazırlaşmışdı, bunu görmək olurdu. Rəqib diqtə etdi.

Oyunçu çatışmazlığı, rotasiya edə bilməməyimiz mövsüm ərzində nəticələrə təsir etdi. İstənilən halda, oynadıq, başda Zaur Paşayev olmaqla bütün basketbolçularıma minnətdaram. Veteran basketbolçumuz gözəl mövsüm keçirdi. Bu yaşda bacarığını yenə də nümayiş etdirdi. Cavan nəsilə gözəl örnək oldu. Qismət olarsa, növbəti mövsümdə yenidən görüşərik, mübarizə apararıq. Təəssüf ki, artıq mövsüm bizim üçün başa çatdı".