Gəncədə keçirilən cüdo üzrə yeniyetmələr arasında Avropa Kuboku başa çatıb.

Prosport.Az xəbər verir ki, Gəncə İdman Sarayında təşkil olunan beynəlxalq turnirin son günündə daha 8 çəki dərəcəsində qalib və mükafatçılar müəyyənləşib. Azərbaycan cüdoçuları 2-ci günü 2 qızıl, 1 gümüş və 8 bürünc olmaqla ümumilikdə 11 medalla başa vurub.

Yusif Nəzər (73 kq) və Yaqub Məmmədov (81 kq) bütün rəqiblərinə qalib gələrək qızıl medal qazanıb. Sadiq Məmmədov (73 kq) gümüş medalla kifayətlənib. Bürünc medallara isə Akif Məmmədli (73 kq), Polad Həsənli, Amin Mehdiyev (hər ikisi 81 kq), Ömər Axundov, Nurəddin Əliyev (hər ikisi 90 kq), Hüseyn Hüseynov, Tamerlan Əliyev (hər ikisi +90 kq) və Məsumə Məmmədli (70 kq) sahib çıxıb.

Xatırladaq ki, turnirin ilk günündə Rza Xəlilli (55 kq) qızıl medal əldə edib. Fatimə Fərmanzadə (48 kq), Fərid Rzazadə (50 kq), İbrahim Talıbov (55 kq), İlkin Qarayev (66 kq) gümüş, Sunay Salamova (40 kq), Fatimə Abdullayeva (44 kq), Könül Eyvazlı (52 kq), Zəhra Mövləmverdiyeva, Nərmin Ağamirzəzadə (hər ikisi 52 kq), Fərid Xudiyev (55 kq), Mehman Əsgərov (60 kq) və Sənan Piriyev (66 kq) bürünc medala yiyələnib.

Beləliklə, Azərbaycan millisi Gəncə Avropa Kubokunu ümumilikdə 3 qızıl, 5 gümüş və 16 bürünc olmaqla 24 medalla komanda hesabında 2-ci pillədə tamamlayıb. Qazaxıstan 9 qızıl, 6 gümüş və 11 bürünc medalla 1-ci olub. 3 idmançı ilə qatılan Türkiyə isə 2 qızıl medalla 3-cü yeri tutub.

Qeyd edək ki, millimiz 10 ölkənin iştirak etdiyi bu yarışa 127 idmançı ilə qatılıb. Bunların 92-si oğlan, 35-i qız cüdoçu olub.