“Azərbaycanın yeniyetmə cüdoçuları növbəti yarışlarda daha çox medallar qazanacaq”.

Bu barədə Prosport.Az-ın Gəncəyə ezam olunmuş əməkdaşına yeniyetmə oğlanlardan ibarət millinin baş məşqçisi Emin İskəndərov açıqlama verib.

Mütəxəssis Gəncədə keçirilən Avropa Kuboku ilə bağlı fikirlərini bölüşüb:

"Cüdoçular bu yarışa yaxşı hazırlaşıb. Almaniyanın paytaxtı Berlindəki turnir zamanı da yaxşı təlim-məşq toplanışı olmuşdu. Yarışlar arasında 1 həftə vaxt oldu. Avropa Kuboku ölkəmizdə keçirildiyi üçün mütləq güləşməlidirlər. Bir az yorğunluq var. Bu, bizim ilk seçim xarakterli yarışımızdır. Bundan sonra hələ 3 belə turnir olacaq. Məncə, növbəti yarışlarda mükafatların sayı artacaq”.

Emil İskəndərov Avropa Kubokunda qızıl mükafat əldə edin Rza Xəlilli (55 kq) haqqında da danışıb:

“Ondan gözləntimiz böyük idi. Təlim-məşq toplanışlarında yaxşı hazırlıq keçib. Finalda qalib gəldiyi İbrahim Talıbov da ondan geri qalmırdı. Rza özünü yaxşı tərəfdən göstərə bildi”.

Baş məşqçi yarışın 2-ci günündə də medallar qazanacaqlarını sözlərinə əlavə edib:

“Namizəd cüdoçularımız var. Belə texniki səhvlər olmasa, idmançılarımız finala vəsiqə qazanacaq. Millinin heyətini bu yarışlardan formalaşdıracağıq. Təhlillər aparacağıq. Burada fərqlənən cüdoçuların bir qismi Berlində, digərləri Tbilisidəki Avropa Kubokunda çıxış edəcək”.

Xatırladaq ki, Gəncə İdman Sarayında təşkil olunan turnurin ilk günündə Azərbaycan cüdoçuları 13 medal əldə edib. Avropa Kuboku bu gün başa çatacaq.