Ötən ay Gənclər və İdman Nazirliyi tərəfindən vəzifəsindən kənarlaşdırılan Gəncə Şəhər Baş İdman İdarəsinin sədri Həmid Nəsirovu kimin əvəzlədiyi məlumdur. Daha doğrusu, nazirliyin müvafiq qərarı ilə Gəncə – Daşkəsən Regional Gənclər və İdman İdarəsi yaradılıb.
Prosport.Az-ın əldə etdiyi məlumata görə, yeni yaradılan idarəyə İntiqam Hüseynov təyin olunub.
O əvvəl “Təhsil” Respublika İdman Mərkəzinin Gəncə filialının direktoru işləyib. Bu vəzifəyə təyin olunanadək isə Gəncə Olimpiya İdman Kompleksinin direktoru olub.
Lakin onun haqda mətbuatda heç də xoş fikir yoxdur. 2016-cı ildə teref.az saytı bakunews.az-a istinadən onun haqda xoş olmayan saxtakarlıq faktlarından yazıb. Məlumatda bildirilib ki, İ.Hüseynov voleybol müəllimi olsa da, adını boks məşqçisi kimi yazdırıb. Onun doğulduğu kənd işğal altında olmasa da, məcburi köçkün statusu ilə dövlətin güzəştlərindən istifadə edib. Filialda direktor işlədiyi müddətdə müəllimlərin maaşından 50-100 manat tutulmasına nail olub. Həmin pullar isə özünə çatıb. Həkim diplomu olmayan şəxsi filiala həkim kimi götürən İ.Hüseynov ağırlıqqaldırma idman zalının istifadəsi üçün 20 manat pul tələbi qoyub. Onun digər fırıldaqlarının da olduğu deyilir. Həmin yazıda onlar bir-bir əks olunub.
Nazirlik rəsmiləri Azad Rəhimovun dövründə təyin olunmuş kadrları təmizləyir. Həmid Nəsirov kimi, Raqif Abbasov (Bakı Şəhər Baş İdman İdarəsinin sabiq sədri), Şamil Quliyev (Tofiq Bəhramov adına Respublika stadionunun sabiq direktoru), Elçin Həsənov (Bakı Su İdmanı Sarayının sabiq direktoru) bu məsələnin qurbanlarıdır. Ancaq sual doğur: bu adamlar pul yeyintisinə görə işdən azad olunubsa, o zaman İntiqam Hüseynova hansı əməllərinə görə göz yumulub?
Xatırladaq ki, Gəncə Şəhər Baş İdarəsinin sabiq sədri olan Həmid Nəsirov bundan əvvəl Azərbaycan Respublikasının İnsan Hüquqları üzrə Müvəkkilinin (Ombudsmanın) Gəncə Regional Mərkəzində məsləhətçi, daha sonra isə Göygöl Rayon İcra Hakimiyyətinin Aparatında Hüquq şöbəsinin müdiri vəzifələrində çalışıb.
Həmid Nəsirov 2020-ildən isə Gəncə Şəhər Gənclər və İdman Baş İdarəsinin rəisi vəzifəsində çalışırdı. O eyni zamanda "Kəpəz" klubunun İdarə Heyətinin üzvü, Yeni Azərbaycan Partiyasının Gəncə Şəhər Təşkilatının ərazi partiya təşkilatının sədridir.
Əziz