24-28 may tarixlərində Bakı Konqres Mərkəzində və Heydər Əliyev Mərkəzində keçirilməli olan SportAkkord Toplantısı (SportAccord Convention) təxirə salınıb.
Prosport.Az-ın xəbərinə görə, tədbir başqa vaxt Bakıda keçiriləcək və yeni tarix barədə qərar daha sonra elan ediləcək.
SportAkkordun türkiyəli prezidenti professor doktor Uğur Ərdənər bildirib ki, tədbir nə vaxtsa yenidən Bakıda olacaq: “Biz Azərbaycandakı və Bakı şəhərindəki tərəfdaşlarımıza SportAkkord Toplantısına ev sahibliyi etməkdə göstərdikləri çeviklik və davamlı öhdəliklərinə görə minnətdarıq. Şübhəsiz ki, vaxtı çatanda bu xüsusi tədbirin müstəsna bir bölümünə ev sahibliyi edəcəklər”.
Gənclər və idman naziri Fərid Qayıbov da bu barədə danışıb: “Azərbaycan idmanın maraqlı tərəfləri üçün təhlükəsiz və etibarlı tərəfdaş olduğunu sübut edib. Şübhəsiz ki, Bakıda keçiriləcək SportAkkord Toplantısı bu bacarığı nümayiş etdirəcək və idmanın gələcəyini formalaşdıracaq müzakirələr üçün ideal mühit təmin edəcək. Dünya idmanının liderlərini növbəti Olimpiya və Paralimpiya Oyunlarına aparan yolda qarşılamağı səbirsizliklə gözləyirik”.
Göründüyü kimi, tədbirin nə üçün ləğv edildiyi barədə məlumat verilməyib. Bizdə olan məlumata görə, seminarlarda qonaq qismində iştirak etmək üçün tələb olunan qiymətlər yüksək olub. Belə ki, aprelin 1-dək olan onlayn qiymətlər bütün tədbir boyu 2 min İsveçrə frankı (qurumun mənzil-qərargahı İsveçrənin Lozanna şəhərində yerləşdiyindən, qiymətlər frankladır – red.), 1 günlük iştirak üçün isə 1000 frank olub. Bu isə bizim pulla müvafiq olaraq 4257 və 2128 AZN təşkil edir. Biletləri yerində kassadan almaq isə 5 günlük tədbir üçün 3 min frank (6385 AZN) və 1 günlük tədbir üçün 1500 frank (3192 AZN) olub. Məhz bu səbəbdən iştirakçı sayı istənilən sayda olmayıb.
Yeri gəlmişkən, bir neçə gün əvvəl Gənclər və İdman Nazirliyinin Biznes və İdman Sammiti adlandırdığı bu toplantının proqramını ictimaiyyətin diqqətinə çatdırmışdıq.
Qeyd edək ki, daha əvvəl Azərbaycanda keçirilməli olan 2 idman tədbiri ləğv edilib və ya təxirə salınıb. Beynəlxalq Xizək və Snoubord Federasiyası (FIS) Şahdağda 14-15 martda keçirilməli olan moqul üzrə Dünya Kubokunun təxirə salındığını açıqlayıb. Martın 7-də açıqlanan qərarda buna səbəb kimi Şahdağdakı şəraitin bu yarışı keçirmək üçün hazır olmadığı və üstəlik Yaxın Şərqdəki müharibəyə görə səyahət imkanlarının məhdud olması göstərilib. Bu səbəbdən Dünya Kuboku növbəti qışa təxirə salınıb.
Bundan 2 gün sonra – martın 9-da isə Ümumdünya Anti-Dopinq Agentliyinin (WADA) Bakı Konqres Mərkəzində keçirilməli olan Avropa üçün Regional Simpoziumu ləğv olunub. 18-19 mart tarixlərində təşkil edilməli olan tədbir Yaxın Şərqdə baş verən müharibəyə görə baş tutmayıb.