NTD komandasının basketbolçusu Murad Babayev klubun mətbuat xidmətinə müsahibə verib. Prosport.Az həmin müsahibəni təqdim edir:

- Pley-in mərhələsində NTD-nin rəqibi “Sumqayıt” olacaq. 1-ci oyun artıq 4 aprel tarixində keçiriləcək. Bu oyundan gözləntilər nədir?
- “Sumqayıt” güclü rəqibdir və bizi çətin oyun gözləyir. Əsas məqsədimiz ilk oyunda üstünlüyü əldə etməkdir. Komanda olaraq tam fokuslanmışıq və qələbə üçün meydana çıxacağıq.

- Hazırlıq necə gedir?
- Hazırlıq yüksək səviyyədə davam edir. Məşqlərdə həm fiziki, həm də taktiki baxımdan ciddi işləyirik. Komandada ab-hava çox yaxşıdır.

- NTD kubokda Sumqayıta qarşı oynadı, amma uduzdu. Bu dəfə fərqli olacağına inanırsınız?
- Əlbəttə, inanıram. Kubok oyununda komandamızın heyəti hələ tam formalaşmamışdı, yeni qoşulan oyunçular uyğunlaşma mərhələsində idi. İnanıram ki, bu dəfə nəticə fərqli olacaq.

- NTD-nin hazırkı formasını necə dəyərləndirərdiniz? Mövsümün ilk yarısı ilə müqayisədə nə dəyişdi?
Düşünürəm ki, artıq daha oturuşmuş heyətimiz var və buna görə daha stabil oyun nümayiş etdiririk. Mən də daxil olmaqla 5-6 oyunçu mövsümə sonradan qoşuldu. Son turda da göstərdik ki, artıq istənilən komandaya problem yarada biləcək gücdəyik.

- Özünüz üçün mövsümü necə dəyərləndirirsiniz?
- Ümumilikdə mövsümü normal qiymətləndirərdim, amma hər zaman daha yaxşısını etmək istəyirəm. Öz üzərimdə işləməyə davam edirəm və komandama maksimum fayda verməyə çalışıram. Əsas məqsədim pley-in və pley-off mərhələlərində daha yaxşı çıxış etməkdir.