Bu gün AFFA ilə "Eyeball" ("Ayboll" – hərfi tərcüməsi "göz topu" mənasını verir) şirkəti ilə 2 illik müqavilə bağlandı.
Oğlanlarda AFFA U-15-Gənclər Liqalarını (ola bilsin ki, Əvəzedicilər Liqasını da), qızlarda AFFA U-16 və Yüksək Liqada bu texnologiya tətbiq olunacaq. Belə ki, oyunlarda statistikanı müəyyənləşdirən bu xüsusi kamera texnologiyası quraşdırılacaq və bunun vasitəsilə oyundan sonra AFFA tərəfindən klublara pulsuz datastatistika təqdim ediləcək.
Bu qurumun saytına baxdıqda "Eyeball"dan Premyer Liqa klublarının 80%-nin, Liqa 1 klublarının 70%-nin, Seriya A klublarının 55%-nin, Bundesliqa klublarının 50%-nin, La Liqa klublarının 40%-nin, Səudiyyə Pro Liqası klublarının 80%-nin və MLS klublarının 80%-nin bu texnologiyadan istifadə etdiyi görünür. Həmçinin, İslandiyanın "Breydablik", Niderlandın "Den Bosx", Danimarkanın "Kopenhagen" klub Akademiya nümayəndələri bu texnologiyadan sonra geridönüşlərin (feedback) müsbətə doğru dəyişdiyini bildirir.
Bəs bu əməkdaşlıqdan Azərbaycan futbolu nə qazanacaq?
1. Futbolçular öz statistikalarını biləcək
Oyundan sonra futbolçular klublara təqdim edilmiş statistika vasitəsilə performansı barədə düzgün data informasiya əldə etmiş olacaq. Bu isə o deməkdir ki, futbolçular kənardan eşidilən təriflərə yox, düzgün real statistikalara inanacaq.
2. Valideyn – məşqçi münaqişəsi sona çatacaq
Əvvəllər oyunlardan sonra valideynlər öz oğullarını tərifləyir, onun yaxşı oynadığını bildirirdi. Heç kim öz ayranına turş deməz. Ancaq indi valideynlər öz övladlarının əsl statistikasını bu texnologiya vasitəsilə müəyyən edə biləcək. Bu isə haqsız yerə övladlarının oynadılmamasını iddia edən valideynlə məşqçi arasındakı münaqişəyə son verəcək.
3. Məşqçilərin işi asanlaşacaq
Uşaq futbolunda məşqçilər bəzən subyektiv qərarları ilə yadda qalırdı. Bu isə uşaq futbolunda müəyyən küsmə və incikliklərə səbəb olurdu. Məşqçi qərarlarına görə (futbolçunun ehtiyatda saxlanılması) valideyn uşağını klubdan çıxarıb, qapı-qapı yeni klub axtarışına çıxırdı. Hər yeni klub isə uşaq psixologiyasında olan futbolçunun adaptasiya olunmasına mane olur və nəticədə itirən uşaq olurdu. İndi isə məşqçi düzgün qərar verməyə çalışacaq. Əks halda, klub Akademiyası koordinatorları həmin məşqçi barədə lazımi tədbir görməyə məhkumdur.
4. Tanış, "dayday" məsələsi bitəcək
Akademiyada olan tanışlıq məsələsi ölkədə geniş vüsət alıb. "Bu, filankəsin oğludur, oynadın" məsələsi sona çatacaq. Ən azından Akademiyasının inkişafını istəyən klub rəhbərliyi koordinator və məşqçilərin tanışlıq və ya "dayday" hesabına oynatdığı futbolçuları tanıyacaq. Əgər bunu bildikdən sonra da tədbir görülməyəcəksə, bu artıq klub rəhbərliyinin vicdanına yazılacaq.
5. Milli məşqçilərinin işi xeyli yüngülləşəcək
Artıq millini çalışdıran U-17, U-19, U-20 və U-21 məşqçiləri tək oyunçuları izlədiyi oyunlara görə yox, həmçinin real statistikalara əsasən heyətə çağıracaq. İstənilən futbolçunun statistikasını klublardan almaq asanlaşacaq.
Bu yazdıqlarımdan sonra sonda onu da bildirim ki, bu heç də Azərbaycanda uşaq futbolunun düzəlməsinə zəmanət vermir. Ancaq AFFA-nın uşaq futbolunu düzəltmək üçün etdiyi bu cəhd alqışlanmalıdır. Ən azından Berlin Futbol Akademiyasına yox, özümüzdə olan Akademiyaların inkişafına cəhd edildiyi üçün.
Səbuhi Musa