Azərbaycan millisinin futbolçusu Elvin Cəfərquliyev "FIFA Series-2026"da Syerra-Leone yığmasına qalib gəldikləri oyundan sonra jurnalistlərin suallarını cavablandırıb. 

Prosport.Az həmin müsahibəni təqdim edir: 

- Görüş haqda düşüncələriniz necədir?
- ⁠Çətin oyun keçdi. Rəqibin güclü komanda olduğunu bilirdik. Fiziki olaraq hazır idilər. Hər iki hissədə də yaxşı mübarizə apardılar. Çox həyəcanlı qarşılaşma olsa da, sevinirik ki, sonda qələbəni biz qazandıq.

- Bu qələbələr sizin özünəinamınıza necə təsir etdi?
- ⁠Belə qələbələr bizə çox özgüvən verir. Bu döyüşkən ruhumuzu növbəti oyunlara da keçirməliyik. Komanda daxilində yüksək motivasiya var. Uşaqlar çox həvəslidir. Belə qələbələri növbəti matçlarda da qazanmaq üçün əlimizdən gələni edəcəyik.

- Yığmanın Millətlər Liqasında üst liqaya yüksəlmə potensialını necə dəyərləndirirsiniz?
- ⁠Özümüzə inanırıq. İtirdiyimiz yerə qayıtmağı çox istəyərdik.

- Çempionlar Liqasında qazandığınız "Oyunun ən yaxşısı" mükafatı ilə bu gün qazandığınız "Turnirin ən yaxşısı" mükafatını necə müqayisə edərdiniz?
- Təbii ki, Çempionlar Liqasında qazandığım mükafat daha vacibdir. Lakin arada böyük fərq görmürəm. Əziyyət çəkib əməyimin qarşılığını gördüyüm üçün xoşbəxtəm.