"Qarabağ"ın polşalı qapıçısı Mateuş Koxalski ölkəsinin sport.pl saytına müsahibə verib.
Prosport.Az həmin müsahibəni təqdim edir:
- Lissabonda “Benfika”ya qarşı Çempionlar Liqasındakı debütünüz ömrünüz boyu xatırlayacağınız bir gün idi?
- Bəli, baxmayaraq ki, Çempionlar Liqasındakı bütün oyunları xatırlayacağam. Gələcəkdə çox oyun keçirsəm, bəziləri yadımdan çıxa bilər. Amma debüt mütləq yadda qalacaq. Üstəlik, çox uğurlu alınmışdı.
- 0:2 hesabı ilə geri düşməyinizə baxmayaraq 3:2 qalib gəldiniz. Pavlidisin vurduğu 2-ci qoldan sonra əsəbi şəkildə əllərinizi yerə vurmuşdunuz. Ən pis ssenarinin hələ qarşıda olduğunu düşünürdünüz?
- Xeyr. Çünki artıq təsnifat mərhələsində yaxşı səviyyədə oynadığımızı göstərmişdik. Hər oyunda böyük hesabla uduzacağımızdan qorxmurdum. 2-ci qoldan sonra sadəcə əsəbiləşmiş və məyus olmuşdum. Bu oyunu çox gözləmişdim, amma bir neçə dəqiqədən sonra hesab 0:2 idi. Əsəbiləşirdim, çünki özümü yaxşı tərəfdən göstərmək istəyirdim, amma hər 2 qolu sadə mövqe səhvlərindən buraxdıq. Əsas odur ki, hər şey yaxşı bitdi.
- Liqa mərhələsində təkcə “Benfika”nı yox, həm də “Kopenhagen”i (2:0) və “Ayntraxt”ı (3:2) məğlub etdiniz, “Çelsi” ilə isə 2:2 oynadınız...
- Bizə kömək edən o idi ki, heç kim bizdən heç nə gözləmirdi. Əksinə, hamı böyükhesablı məğlubiyyətlər gözləyirdi. Biz də özümüzə təzyiq etmirdik. Demirdik ki, mütləq kiməsə qalib gəlib 1/16 finala çıxmalıyıq. Bu, düzgün yanaşma idi.
- Debütdən əvvəl evdə dəfələrlə Çempionlar Liqasının himnini dinləmişdiniz. Lissabondakı oyundan əvvəl himn artıq təsir etmədi?
- Yenə də təsir etdi. Çünki onu möhtəşəm stadionda, dolu tribunalar qarşısında eşitmək tamam başqa hissdir. Bütün atmosfer çox təsiredici idi.
- Əlavə stress hiss etdiniz?
- O vaxt yox. Ümumiyyətlə, yalnız bir dəfə - “Enfild”də “Liverpul”a qarşı oyundan əvvəl hiss etdim. Tuneldə dayanarkən azarkeşlər “You’ll Never Walk Alone” oxuyurdu və o an arzularımın reallaşdığını hiss etdim, az da olsa həyəcan yarandı. Amma tez keçdi. Təəssüf ki, ilk qolu buraxandan sonra.
- Bu Çempionlar Liqası mövsümünü necə xatırlayacaqsanız?
- Ümumilikdə yaxşı xatırlayacağam. Amma son hissəni unutmaq istərdim. Bir tərəfdən, möhtəşəm stadionlarda böyük oyunlar, digər tərəfdən isə buraxdığımız çoxlu qollar. Bu, həqiqətən yaxşı deyildi və məni əsəbiləşdirirdi. Xüsusilə də ciddi səhvim yox idi. Rəqiblər bizə çox asan qol vururdu, əks-hücumlarda yaxalayırdılar. Bəzən özümü aciz hiss edirdim.
- Xüsusilə “Nyukasl”la ilk oyunda fasiləyə qədər 0:5 hesabı ilə uduzduğunuz zaman?
- Dəhşət idi. Oyuna yaxşı əhval-ruhiyyədə çıxmışdım, mübarizə aparacağımıza inanırdım. Amma 2-ci hissəyə çıxanda artıq yalnız daha çox biabır olmamaq barədə düşünürdüm. Konsentrasiyanı qorumaq istəyirdim, hesabın necə olmasından asılı olmayaraq maksimum oynamağa çalışırdım.
- “Qarabağ”ın hücum futbolu buna mane oldu?
- Bir tərəfdən yox. Məhz bu üslubla “Benfika”ya qarşı oyunu çevirdik, “Çelsi” ilə heç-heçə etdik. Sadəcə “Liverpul” və “Nyukasl”la oyunlarda heç nə alınmadı. Erkən qol buraxdıq, komanda dağıldı və öz oyunumuzu qaytara bilmədik. Üstəlik, daha əvvəl qarşılaşmadığımız səviyyədə rəqiblərlə oynayırdıq.
- Lissabon, Bilbao, Neapol, Liverpul, Nyukasl kimi şəhərlərdə oynadınız. Hansı an daha çox yaddaqalan oldu?
- Premyer Liqada oynamaq arzum var, ona görə Liverpulda keçirdiyim anlar xüsusi idi. Amma “Napoli” ilə oyunu da yaxşı xatırlayıram. Məğlub olmağımıza baxmayaraq, yaxşı çıxış etdim və bu, mənə böyük motivasiya verdi.
- Çempionlar Liqası sizə nə öyrətdi?
- Bu, əvəzolunmaz təcrübə oldu. Mənə motivasiya verdi ki, bu səviyyəyə yenidən qayıdım.
- “Qarabağ”ın uğurunun sirri nədir?
- Əsas amil Qurban Qurbanovdur. O, 18 ildir komandadadır. Üstəlik, klubun çox güclü skautinq sistemi var. “Qarabağ” aşağı liqalardan oyunçular tapır və onları inkişaf etdirir.
- 2024-cü ildə “Qarabağ”a keçidinizə nə təsir etdi?
- Bu, qərar asan deyildi. Açığı, başqa təklifim də yox idi. Risk etdim və buna dəyərdi.
- İlk təəssüratınız necə idi?
- Hamı çox mehriban idi. Amma ailəmdən uzaq olmaq çətin idi.
- Heç peşman oldunuz?
- Bəli, bir neçə dəfə. Amma yalnız hisslərimə görə.
- Qışda “Vidzev”ə keçməyə hazır idiniz?
- Bəli, layihə maraqlı idi, amma transfer baş tutmadı.
- Gələcək planlarınız nədir?
- Premyer Liqada oynamaq arzumdur. Amma şərtim odur ki, əsas heyətdə oynayım.
- Bəs Polşa millisi?
- Hələ debüt etməliyəm. Özümü digər qapıçılardan zəif hesab etmirəm. Yaxşı formada olsam, şansım olacaq.