Azərbaycan cüdoçusu Hidayət Heydərov (73 kq) Gürcüstanın paytaxtı Tbilisidə keçirilən "Böyük Dəbilqə" turnirində bürünc medal qazanıb.

Prosport.Az xəbər verir ki, o, 3-cü yer uğrunda qarşılaşmada İspaniyanı təmsil edən Anton Şuxaliyevə qalib gəlib.

Qeyd edək ki, ötən gün tatamiyə  çıxan digər təmsilçilərimizdən Kamran Süleymanov (73 kq), Südabə Ağayeva və Aytac Qardaşxanlı (hər ikisi 70 kq) yarışı mükafatsız başa vurublar.

Yarışın ilk günündə Turan Bayramov (66 kq) gümüş medal qazanmaqla fəxri kürsünün 2-ci pilləsinə qalxıb.

Qeyd edək ki, "Böyük Dəbilqə"nin son günündə Azərbaycanın daha 3 cüdoçusu mübarizəyə qoşulacaq. Camal Qamzatxanov, Kənan Nəsibov (hər ikisi +100 kq) və Mədinə Kaysinova (+78 kq) medal qazanmağa çalışacaq.