2020-ci ilin əvvəlindən Azərbaycan idmanında yeni vəzifə açıldı. Bu cığırın səbəbkarı AFFA-nın sabiq baş katibi Elxan Məmmədov oldu. O, 2020-ci ilin 28 yanvarında AFFA-nın icraçı vitse-prezidenti seçildi.
İngilis dilində Executive vice-president, rus dilində Исполнительный вице-президент kimi adlandırılan bu vəzifə bəzi hallarda baş katib vəzifəsindən daha üstündür. Elxan Məmmədovun bu vəzifəyə seçilməsi də federasiyada bütün icraçı hüquqları öz əlində cəmləməsi üçün idi.
Bunadək federasiya prezidentindən sonra 2-ci adam sənəddə baş katib funksiyası sayılırdı. Əslində AFFA-da bu sistem demək olar ki, bu qaydada işləyirdi. Faktiki olaraq Rövnəq Abdullayevdən sonra 2-ci adam Elxan Məmmədov sayılırdı.
Baş katib vəzifəsi isə vitse-prezident postundan da üstündür. Çünki bütün sənədləşmə işlərində əksərən baş katibin imzası olur. Vitse-prezidentlər isə əsasən ya sponsorlar, ya keçmiş idmançılar (Taekvondo Federasiyasında Niyaməddin Paşayev, Cüdo Federasiyasında Elnur Məmmədli, Atıcılıq Federasiyasında Zemfira Meftahətdinova, Güləş Federasiyasında Namiq Abdullayev və Fərid Mansurov), ya da keçmiş məşqçilər (AFFA-da bir müddət Vaqif Sadıqov olub) olur.
Lakin təsis edilən icraçı vitse-prezident postu baş katibdən də üstün hesab olunur. Ona görə də 2022-ci ilin martın 17-də Sərxan Hacıyev baş katib təyin olunsa da, faktiki olaraq icraçı hüquqları Elxan Məmmədovda qaldı. Daha sonra Elxan Məmmədov AFFA-dan ayrıldı. 2024-cü ilin aprelin 2-də Sərxan Hacıyev onun yerinə icraçı vitse-prezident seçildi.
Hazırda 4 federasiyamızda icraçı vitse-prezident postu var. Bunlar hansılardır?
AFFA
Sərxan Hacıyev 2024-cü ilin aprelin 2-dən icraçı vitse-prezidentdir. O, ötən ilin fevralın 3-dək həm də AFFA-nın baş katibi funksiyasını icra edirdi. Həmin tarixdən etibarən Cahangir Fərəcullayev baş katib təyin olunub. Mətbuatda gedən təzyiqlərin daha çox Cahangir Fərəcullayev üzərində olduğunu nəzərə alsaq, AFFA-da baş katib funksiyası hazırda icraçı vitse-prezident vəzifəsindən daha çox səlahiyyətə malikdir.
Azərbaycan Cüdo Federasiyası
16 noyabr 2021-ci ildən bu federasiyanın baş katibi təyin olunmuş Rəşad Rəsullu 2024-cü ilin 20 aprelində icraçı vitse-prezident seçildi. Hazırda bu vəzifə baş katib funksiyasını da özündə ehtiva etdiyindən, yeni baş katib təyinatının olması gözlənilmir.
Azərbaycan Basketbol Federasiyası
Bu federasiyanın sabiq icraçı direktoru Fərrux Mahmudov 1 il "Neftçi" PFK-nın baş icraçı direktoru vəzifəsində çalışdı. O, 2024-cü ilin iyununda Basketbol Federasiyasına icraçı vitse-prezident vəzifəsində qayıtdı. Burada baş katib isə hələ əvvəlki rəhbərliyin vaxtından Vüqar Əzimovdur. Burada icraçı vitse-prezident vəzifəsi daha üstündür.
Azərbaycan Su İdmanı Növləri Federasiyası
Təxminən 10 il (2012-2022) Azərbaycan Velosiped Federasiyasının baş katibi işləmiş Fərhad Əliyev 2022-ci ilin yanvarından Azərbaycan Milli Avarçəkmə Federasiyasına (daha sonra Azərbaycan Kanoe və Avarçəkmə Federasiyası oldu) baş katib təyin edildi. Martın 14-də Prosport.Az-ın daha əvvəl yazdığı xəbər təsdiqini tapanda (Yelkən Federasiyasının ləğvi və ya Su İdmanı Növləri Federasiyasına birləşdirilməsi), Fərhad Əliyev yeni federasiyaya icraçı vitse-prezident seçildi. Bu qurumda da yeni baş katib təyinatının olacağı gözlənilmir. Çünki icraçı vitse-prezident vəzifəsində baş katiblik funksiyası da var.
Səbuhi Musa