Martın 14-də yeni yaradılmış Azərbaycan Su İdmanı Növləri Federasiyasının (keçmiş Azərbaycan Kanoe və Avarçəkmə Federasiyası (AKAF) prezidenti və vitse-prezidenti vəzifələrinə seçkilər keçirilib.

"Azərişıq" ASC-nin sədri Vüqar Əhmədov əvvəlki federasiyada olduğu kimi növbəti 4 il müddətinə prezident seçilib. Vitse-prezident vəzifəsinə seçilənlər isə Kamil Hüseynov, Fərid Əmirov və Namiq Orucovdur. Əvvəl AKAF-da baş katib olan Fərhad Əliyev isə icraçı vitse-prezident seçilib.

Bu vitse-prezidentlərdən Kamil Hüseynov və Fərid Əmirov AKAF-da da bu vəzifəni yerinə yetirib. Onlar 2021-ci ilin 22 dekabrından bu vəzifədədirlər. Ona görə də onları tanıtmağa ehtiyac yoxdur.

Bu vitse-prezidentlərdən yalnız Namiq Orucov idmanda yeni simadır. O kimdir?

Prosport.Az-ın araşdırmasına görə, o da sədri kimi "Azərişıq"dan gəlib. Namiq Orucov bu qurumda sədr müavinidir. O, 2022-ci ilin noyabrında Londonda Böyük Britaniyanın nüfuzlu və peşəkar mühasib təşkilatı – Setrifikatlı Maliyyə Menecerləri İnstitutunun (ICB/ICFM Global) keçirdiyi sammitdə "İlin maliyyə direktoru" və “Maliyyə sahəsinin inkişafına görə” nominasiyalarına layiq görülüb.

Federasiyanın İdarə Heyətinə isə Rəhman Xanlarov və Burcu Alqon Corcanni seçilib. Həyat yoldaşı italyan, özü isə milliyyətcə türk olan Burcu Alqon Corcanni əvvəllər (26 aprel 2022-ci ildən) Yelkən Federasiyasında vitse-prezident olub. O bu postda AKAF-da İdarə Heyətinin üzvü olmuş Leyla Əliyevanı əvəzləyib. Rəhman Xanlarov isə əvvəl də AKAF-ın İdarə Heyətində təmsil olunub.