Azərbaycan Su İdmanı Növləri Federasiyasının rəhbərliyinə seçkilər keçirilib.

Prosport.Az xəbər verir ki, səsvermənin nəticələrinə əsasən, Vüqar Əhmədov növbəti 4 il müddətinə federasiyanın prezidenti seçilib.

O, göstərilən etimada görə təşəkkürünü bildirib, federasiyaların birləşdirilməsi nəticəsində daha böyük və vahid idman qurumunun formalaşdığını vurğulayıb.

Səsvermənin nəticələrinə əsasən, Kamil Hüseynov, Fərid Əmirov və Namiq Orucov federasiyanın vitse-prezidentləri, Fərhad Əliyev isə icraçı vitse-prezident, Rəhman Xanlarov və Burcu Alqon Corcanni İdarə Heyətinin üzvləri seçilib. Daha sonra Nəzarət-Təftiş Komissiyasına da seçkilər keçirilib. Arif Ləzimzadə sədr, Vüsal Qurbanov və Elvin Heydərov isə üzv seçilib.

Sonda Milli Olimpiya Komitəsinin vitse-prezidenti Çingiz Hüseynzadə çıxış edərək federasiyanın yeni seçilmiş rəhbərliyini təbrik edib, gələcək fəaliyyətlərində onlara uğurlar arzulayıb.

Qeyd edək ki, Azərbaycan Yelkən Federasiyası ləğv edilib və yelkən idmanı Azərbaycan Kanoe və Avarçəkmə Federasiyasının tərkibinə verilib. Bununla da yeni adda idman federasiyası formalaşdırılıb.