Yaxın Şərqdə – cənub qonşumuz İran və Ərəbistan yarımadasında gedən müharibə prosesi Azərbaycandan da yan keçməyib.
Prosport.Az-ın xəbərinə görə, əvvəlcə martın 7-də Beynəlxalq Xizəksürmə və Snoubord Federasiyası (FIS) 14-15 martda Şahdağ Turizm Mərkəzində keçirilməli olan moqul üzrə Dünya Kubokunun finallarının ləğv olunduğunu açıqladı.
Düzdür, məlum oldu ki, Azərbaycan həm də bu Dünya Kubokunu hava şəraiti baxımından keçirməyə hazır deyilmiş. Açıqlamaya nəzər salaq: "Hazırlıq prosesi zamanı məlum oldu ki, mövcud təbii və qış şəraiti bu səviyyəli tədbir üçün gözlənilən keyfiyyəti və yarış mühitini təmin etmək üçün tam uyğun deyil. Eyni zamanda, məhdud səyahət seçimləri və bəzi regional hava limanlarında müvəqqəti tutum məhdudiyyətləri də daxil olmaqla müəyyən logistika amilləri idmançılar və qonaqlar üçün səyahətin rahatlığına təsir göstərə bilər.
Ölkəmiz tədbirə ev sahibliyi etməyə tam hazır olsa da, həm Azərbaycan, həm də FIS üçün prioritet yarışı mümkün olan ən yaxşı şəraitdə təşkil etmək və idmançılar, komandalar və tamaşaçılar üçün ən yüksək səviyyəli təcrübə təmin etməkdir. Buna görə də Şahdağda moqul üzrə Dünya Kuboku Finallarının təşkilini növbəti qış mövsümünə təxirə salmaq barədə birgə qərar qəbul edilib.
Bu qərar təşkilatçılara optimal idman şəraitini təmin etməyə və həm Azərbaycanın, həm də FIS-in ambisiyalarını əks etdirən dünya səviyyəli tədbir keçirməyə imkan verəcək".
Daha sonra Bakıda 18-19 martda keçirilməli olan Ümumdünya Antidopinq Agentliyinin (WADA) Avropa üzrə Regional Simpoziumu Yaxın Şərqdəki vəziyyət səbəbindən təxirə salınıb. Simpoziumdan əvvəl Bakı şəhərində təşkil olunması nəzərdə tutulan WADA-nın İcraiyyə Komitəsinin (ExCo) iclasının isə onlayn formatda keçirilməsinə qərar verilib.
Yaxın Şərqdə müharibə vəziyyəti davam edəcəyi halda, Azərbaycanda bu il keçirilməli olan aşağıdakı beynəlxalq tədbirlər də ləğv edilə bilər. Onlar hansılardır?
3-5 aprel. Bədii gimnastika üzrə AGF Trophy International turniri (Bakı)
17-19 aprel. Bədii gimnastika üzrə Dünya Kuboku (Bakı)
30 aprel - 3 may. Bədii gimnastika üzrə Avropa Kuboku (Bakı)
4-5 aprel. Cüdo üzrə yeniyetmələrin Avropa Kuboku (Gəncə)
29 aprel - 1 may. Akademik avarçəkmə və kanoe üzrə Prezident Kuboku (Mingəçevir, Ağdərə (Suqovuşan kəndi)
10-14 may. Şose velosipedi üzrə Bakı-Xankəndi Azərbaycan velosiped yarışı (Bakı, Sumqayıt, Şamaxı, İsmayıllı, Qəbələ, Oğuz, Şəki, Mingəçevir, Gəncə, Göygöl, Goranboy, Ağdərə (Suqovuşan, Talış kəndləri), Naftalan, Tərtər, Ağdam, Füzuli, Şuşa, Xankəndi
21 avqust – 6 sentyabr. Qadın voleybolu üzrə Avropa çempionatı (BAKI, AZƏRBAYCAN) – C qrupunun oyunları Milli Gimnastika Arenasında keçiriləcək (21 avqustda Portuqaliya, 23 avqustda İspaniya, 24 avqust Rumıniya, 26 avqust Belçika, 28 avqustda Niderlandla oynayacağıq)
5-7 iyun. Akrobatika gimnastikası üzrə Dünya Kuboku/AGF Trophy International turniri (Bakı)
25-26 iyul. Cüdo üzrə Cüdo Ümidləri turniri (Abşeron)
27 iyul - 2 avqust. Güləş üzrə U-17-lərin dünya çempionatı (Bakı)
24-26 sentyabr. Formula 1 üzrə Azərbaycan Qran-prisi (Bakı)
1-3 oktyabr. Üzgüçülük üzrə İpək Yolu Dünya Kuboku
17-18 oktyabr. Sumo üzrə dünya çempionatı (Bakı)
Həmçinin, Bakı 24-28 mayda "SportAccord" Dünya İdmanı və Biznes Sammitinə ev sahibliyi etməlidir.
Qeyd edək ki, 2026-cı il Bakı dünyada ilin idman paytaxtı seçilib.
Səbuhi Musa