Avstriyanın Lints şəhərində keçirilən cüdo üzrə Qran-prinin 2-ci günündə yığmamız aktivinə daha 2 medal yazdırıb. 

Prosport.Az xəbər verir ki, hər 2 medal 81 kq çəki dərəcəsində əldə edilib.

Vüsal Qələndərzadə gümüş, Ömər Rəcəbli bürünc mükafata layiq görülüb. Qələndərzadə zədələndiyi final görüşündə Adilet Almata (Qazaxıstan) məğlub olub. Rəcəbli isə 3-cü yer uğrunda qarşılaşmada finlandiyalı Eetu İhanamakiyə qalib gəlib.

Xatırladaq ki, ötən gün Ruslan Paşayev (66 kq) yarışın qalibi olmuşdu. 

Hesabında bir dəst medal olan Azərbaycan 59 ölkə arasında ümumi komanda sıralamasında 3-cü, kişilər arasında isə 1-ci pillədə qərarlaşıb.