Şahmat üzrə Azərbaycan çempionatında 4-cü yeri tutan Türkan Məmmədyarova Prosport.az-ın suallarını cavablandırıb.

Həmin müsahibəni təqdim edirik:

– Yarışla bağlı fikrinizi bildirərdiniz. Azərbaycan çempionatı sizin üçün necə keçdi?
– Düşünürəm ki, yarış mənim üçün yaxşı keçdi və qənaətbəxş hesab etmək olar. Ümumiyyətlə, mən bu sistemi sevirəm, keçən il də bu sistemlə olmuşdu. Yarış mənə görə yaxşı keçdi, uğurlu saya bilərəm.

– Ayan Allahverdiyeva ilə görüşünüz finaldan daha çox ajiotaj doğurdu. Bu barədə nə deyə bilərsiniz?
– Əslində orada bir qədər anlaşılmazlıq oldu. Əslində orada Ayanın səhvi var idi, amma məğlubiyyət nəticəsində deyildi. Əslində biz bilmirdik ki, 2 səhvdən sonra məğlubiyyət verilir. Təbii ki, mən belə qalibiyyəti istəmədim. Düşündüm ki, oynamaq daha yaxşı olar. Qərarımdan peşman deyiləm. Mənim üçün belə qərar xoş idi. Heç bir peşmançılığım da yoxdur.

– 3-cü yer uğrunda görüşdə Gülnar Məmmədovaya məğlub oldunuz. Sizcə, nə çatmadı?
– Əslində deməzdim ki, nəsə çatmadı. Rəqibim də çox güclü idi, millinin üzvüdür. Burada qeyri-adi nəsə olmadı. 2 nəfər oynayırsa, biri udur, biri isə uduzur. Burada da ağır oyun getdi. 2 oyunda heç-heçə, sonra daha bir heç-heçə. Sonda məğlub oldum. Rəqibi təbrik edirəm.

– Türkan Məmmədyarovanı bu il millidə görə bilərik?
– Bu il yəqin ki, çətin. Millinin heyəti artıq məlumdur. Amma sonrakı illərdə ola bilər.

– Beynəlxalq yarışlarda iştirakı düşünürsünüz?
– Bəli, planlaşdırıram. Qarşıda Avropa çempionatı var.