Cüdo üzrə Azərbaycan milli komandasının performans direktoru Rixard Trautmann müsahibə verib.
Prosport.Az alman məşqçinin müsahibəsini təqdim edir:
– Milli komandanın Daşkənd Böyük Dəbilqəsində çıxışını necə dəyərləndirirsiniz?
– Milli komandanın ümumi çıxışını müsbət qiymətləndirirəm. Daşkənd Böyük Dəbilqəsində 4 qızıl, 1 gümüş və 2 bürünc medal qazandıq. Kişilərin mübarizəsində 1-ci, ümumi komanda hesabında isə 2-ci olduq. Bu, kifayət qədər yaxşı göstəricidir.
– Bu uğurun əsas səbəbini nədə görürsünüz?
– İlk növbədə nizam-intizama əməl olunmasında görürəm. İntizama riayət edən, məşqlərə səylə qatılan, verilən tapşırıqları düzgün yerinə yetirən, bir sözlə daha peşəkar yanaşma göstərən idmançılar sonda nəticə də verir. Çalışırıq ki, işimizə hərtərəfli yanaşaq. Bilirsiniz ki, yeni olimpiya tsiklində cüdo idman növündə qaydalara əhəmiyyətli dəyişikliklər edildi. Yeni qaydalara uyğun olaraq məşq prosesini tənzimləmişik, məşq prosesinə yanaşma daha fərqlidir. Bundan əlavə, məşqçilər korpusunda hər bir mütəxəssisin məsuliyyətində olan idmançılar var. Cüdoçular da konkret bilir ki, nəticəsinə görə hansı məşqçi birbaşa cavabdehdir və bu hər iki tərəfin məsuliyyətini daha da artırır. Tibbi dəstək, dietoloqun prosesə cəlbi, performans analizi – bir sözlə, federasiyanın yaratdığı hərtərəfli şərait uğurlu nəticələrin əldə olunmasında mühüm rol oynayıb.
– Cüdoçularımız Özbəkistanda keçirilən beynəlxalq turnirdə ne-vazada (cüdoda yerdə mübarizə – red.) da xüsusilə yaxşı çıxış etdi. Bunu nə ilə izah edirsiniz?
– Əslində bu istiqamətdə komanda olaraq uzun müddətdir çalışırıq. Həm yeniyetmələr, həm gənclər, həm də böyüklərdən ibarət yığmalarda ne-vaza üzrə xüsusi çalışmalar aparılır. Bura gələndə ilk olaraq gördüyüm problemlərdən biri Azərbaycan komandasının ne-vazada zəifliyi idi. Əvvəllər idmançılar ne-vaza məşqlərinə o qədər də həvəsli yanaşmırdı. Çünki buna öyrəşməmişdilər. Amma artıq ne-vaza üzrə ayrıca texniki sessiyalar və məşqlər keçiririk. Nəticəsini də yavaş-yavaş görməyə başlamışıq. Məsələn, Balabəy Ağayev Daşkənddə yarımfinalda yaponiyalı güclü idmançı Taiki Nakamuranı ne-vazada üstələdi. Çempion olan Ömər Rəcəbli isə keçirdiyi 5 görüşün 4-də rəqiblərini ne-vazada osaekomi (saxlama) texnikaları ilə məğlub etdi. Ömər yaponiyalı dünya mükafatçısı Sotaro Fucivaranı ne-vazada dəqiq icra olunmuş “kuzure-kami-şiho-qatame” texnikası ilə yendi. Murad Fətiyev və Kənan Nəsibov da ne-vazada yaxşı cüdo nümayiş etdirdi. Bununla belə, inkişaf etməli olduğumuz çox məqam var və bu istiqamətdə işimizi davam etdirəcəyik.
– Hidayət Heydərov da bu yarışda iştirak etməli idi. Lakin çəkisini sala bilmədiyinə görə qatıla bilmədi. Azərbaycan Cüdo Federasiyası buna görə cüdoçu barədə intizam tədbiri görüldüyünü açıqladı...
– Hidayət Azərbaycan cüdosunun ən önəmli simalarından biridir. O, olimpiya, dünya və dördqat Avropa çempionudur. Amma kimliyindən asılı olmayaraq, bizim üçün intizam bir nömrəli məsələdir. Hamı qaydalara əməl etməlidir. Təəssüf ki, Daşkənddə çəkisini sala bilmədiyi üçün yarışa buraxılmadı. Bu səbəbdən federasiya tərəfindən müvafiq tədbirlər görüldü. Ümid edirəm ki, Hidayət bundan nəticə çıxaracaq. Şəxsən mən onun gələcəkdə də dünya və olimpiya çempionu olmaq potensialına tam əminəm. Hər şey onun özündən və işə yanaşmasından asılıdır.
– Milli komandada başqa kimdən narazılığınız var?
– Ümumilikdə, təbii ki, iş prosesində müəyyən məsələlər olur və biz bunları komandanın daxilində həll etməyə çalışırıq. Təəssüf ki, bəzən dəfələrlə edilən xəbərdarlıqlara baxmayaraq, idmançılar yenə intizamı pozur. Bunlardan biri Elcan Hacıyevdir. Elcana dəfələrlə xəbərdarlıq edilsə də, bundan nəticə çıxarmayıb və ona da müvafiq cəza tətbiq olunub. Onun böyük potensialı var: Avropa çempionu, dünya mükafatçısıdır. O, öz çəkisində aparıcı cüdoçulara müxtəlif yarışlarda qalib gəlib. Lakin bu potensialı reallaşdırmaq, dünya və olimpiya çempionu olmaq üçün Elcan işə yanaşmasını dəyişməli, daha intizamlı və peşəkar olmalıdır. Mən ümid edirəm ki, Elcan da müvafiq nəticələr çıxaracaq və özündə lazımi dəyişiklikləri edəcək.
– Uğurda intizam faktorunu önə çıxarırsınız. Bəzən istedadlı idmançılara müəyyən güzəştlər olunur. Sizcə, güzəşt edilməlidirmi? Ümumiyyətlə, istedad, yoxsa intizam daha önəmlidir?
– Başqa sahələr barədə deyə bilmərəm, amma idman tarixi göstərir ki, istedadla siz yalnız müəyyən mərhələyədək gedə bilərsiniz. Əgər zirvəyə qalxmaq və uzun müddət həmin zirvədə qalmaq istəyirsinizsə, mütləq intizamlı və peşəkar olmalısınız. İstedadınız çox yüksək olmasa belə, intizam və zəhmətlə həm həyatda, həm də idmanda ciddi uğurlar qazana bilərsiniz. Hətta olimpiya və dünya çempionu ola bilərsiniz. Lakin təkcə istedad hesabına buna nail olmaq mümkün deyil. Nizam-intizamlı, səylə çalışanlar yalnız istedada güvənənləri hər zaman üstələyir. Biz bütün yaş qruplarından ibarət yığma komandalara bunu izah etməyə çalışırıq. İdmançılarımızın əksəriyyəti intizam sarıdan axsamır, qaydalara riayət edirlər və əminik ki, bu yanaşma nəticələrimizə də müsbət təsir göstərəcək.