Azərbaycan cüdoçusu Hidayət Heydərov (73 kq) Özbəkistanın paytaxtı Daşkənddə keçirilən "Böyük Dəbilqə" turnirində iştirak etməyib.

Prosport.Az report-a istinadən xəbər verir ki, olimpiya, dünya və Avropa çempionu 1/16 finalda Arun Kumarla (Hindistan) görüşə qatılmayıb. O, çəkisini sala bilmədiyinə görə yarışa buraxılmayıb.

Federasiya idmançı ilə bağlı daxili intizam qaydalarına uyğun olaraq tədbir görüb.

Xatırladaq ki, 28 yaşlı Hidayət Heydərov ötən il Monteneqronun paytaxtı Podqoritsada keçirilmiş Avropa çempionatında da yarışa bilməmişdi. Federasiya onun xəstələndiyini bildirsə də, həmin vaxt da onun çəkisini aşağı sala bilmədiyi qeyd edilirdi.

Bu gün Azərbaycanın 5 cüdoçusu sözügedən yarışda mübarizəyə başlayacaq. Kamran Süleymanov (73 kq) 1/32 final mərhələsində yaponiyalı Şusuke Uçimura ilə, Ömər Rəcəbli (81 kq) 1/16 finalda rumıniyalı Adrian Sulka ilə, Fidan Əlizadə (63 kq) eyni raundda özbəkistanlı Sevinç İsokova ilə, Südabə Ağayeva (70 kq) rusiyalı Kamila Badurova ilə üz-üzə gələcək.

Qeyd edək ki, "Böyük Dəbilqə" sabah başa çatacaq. Ötən gün Əhməd Yusifov qızıl, Balabəy Ağayev (hər ikisi 60 kq) gümüş medal qazanıb.