"Gəncə" basketbol komandası 2-ci dəfə Azərbaycan Kubokunun sahibi oldu.

Prosport.Az klubun icraçı direktoru, komandaya sponsorluq edən Elm və Təhsil İşçiləri Həmkarlar İttifaqı Respublika Komitəsinin şöbə müdiri Elnur Cəfərovdan müsahibə götürüb.

– "Gəncə"yə yeni rəhbərlik gəldikdən sonra ilk titul qazanıldı. Əvvəldən Azərbaycan Kubokunu qazanmaq məqsədinizdə vardı? Yoxsa məqsəd mümkün qədər irəliləmək prinsipi idi?
– Avqust-sentyabr aylarında bu komanda ilə işə başlayanda 2 hədəfimiz vardı: 1-cisi liqada mümkün qədər yüksək yer tutmaq idisə, digər hədəfimiz ölkə Kubokunun qalibi olmaq idi. Çempionatda A qrupunda "Neftçi" ilə birgə 3-cü yerdəyik. Düzdür, pley-offadək hələ 3 oyunumuz var. 2-ci hədəfimizə isə nail olduq. "Sabah" çox güclü komandadır, çempionatda 1 məğlubiyyətləri vardı. Onları yenməyi bacardıq. Yarımfinala hamı "Abşeron Layns"ın çıxacağını düşünsə də, "Şəki" qalib gəlməyi bacarmışdı. Biz də "Sabah"ın məğlubedilməzliyi ilə bağlı yaradılmış mifi dağıtdıq. Onlara mövsüm ərzində 2-ci məğlubiyyəti biz yaşatdıq. Buna görə komandanı təbrik edirəm. Komandanın əzmi və iradəsi sayəsində biz bunu bacardıq. Oyunçulara da demişdim ki, rəqib güclü görünə bilər, lakin kim əzm, döyüş nümayiş etdirəcəksə, o da qalib gələcək. Onlar yüksək əzmkarlıqla və döyüşməklə buna nail oldular.

– Demək olarmı ki, kimin yerli oyunçusu daha yaxşı çıxış etdisə, o da qalib gəldi?
– Bəli, belə demək olar. "Şəki" ilə oyunda bizim yerli oyunçularımız daha yaxşı çıxış etdi. Çünki Cəbrayıl Əkbərov, Ulaş Turqut və Nəzər Quliyev 30 xaldan yuxarı topladı. Mirməcid İsmayılov və İslam Rzayevin də xallarını bura əlavə etsək, yerli oyunçular təxminən 40 xallıq atış edib. "Sabah"la oyunda əcnəbilərimiz yaxşı oynadı. Nəticə etibarı ilə qalib gəldik. Bizə Azərbaycan Kubokunu qazanmaq lazım idi. Bu, komanda oyunudur, burada fərdlər rol oynamır. Rəqibdə Hassani Qravett 22 xal toplasa da, tək onun bacarığı ilə komanda qalib gələ bilmədi. Komanda şəklində güclü biz idik deyə, biz də qalib gəldik.

– Azərbaycan Kubokunda qalib gəlmək həm də o deməkdir ki, "Gəncə" Azərbaycanı növbəti mövsüm ilk dəfə avrokubokda təmsil edə bilər. Klub rəhbərliyinin bu barədə fikri necədir?
– Bəli, orada iştirak etmək planımız var. Növbəti mövsüm Gəncəni FIBA Avropa Kubokunda təmsil etmək istəyirik. A qrupunda 2 region komandası var: "Gəncə" və "Şəki". Həmişə Bakı komandaları Avropada çıxış edib. Niyə də ilk olaraq bir region klubu Avropada təmsil olunmasın?! Əminəm ki, orada da yüksək nəticələr göstərə bilərik.

Səbuhi Musa