Azərbaycanın qadın cüdoçusu, ötən il Səudiyyə Ərəbistanında İslam Həmrəyliyi Oyunlarının qalibi olmuş Südabə Ağayeva (70 kq) Prosport.Az saytının suallarını cavablandırıb.

2022 və 2025-ci illərdə keçirilmiş İslamiadaların üçqat medalçısı ilə müsahibəni təqdim edirik:

– Özünüz haqda qısa məlumat verərdiniz. Necə oldu ki, cüdoya maraq yarandı və bu idmana gəldiniz?
– Mən uşaqlıqdan idmana maraqlı olmuşam. Enerjili uşaq idim və ailəmin dəstəyi ilə cüdoya başladım. İlk məşqlərdən bu idman növünün mənə uyğun olduğunu hiss etdim. Rəqabət, intizam və tatamidə mübarizə ruhu məni cəlb etdi. Zaman keçdikcə cüdo həyat tərzimə çevrildi və məqsədim hər zaman özümü inkişaf etdirərək daha yüksək nəticələr qazanmaq olub.

– Ötən ilin sonlarında Azərbaycan çempionu oldunuz. Ölkə çempionatını və oradakı çıxışınızı necə dəyərləndirərsiniz?
– Ötən ilin sonunda Azərbaycan çempionu olmaq mənim üçün çox önəmli idi. Bu nəticə zəhmətimin qarşılığı oldu. Yarış ərzində fokusumu qorumağa çalışdım və hər görüşə ciddi yanaşdım. Bu çempionluq mənə həm motivasiya verdi, həm də məsuliyyətimi artırdı.

– Qarşıda Daşkənd "Böyük Dəbilqə" turniri var. Parisdəki analoji turnirdə iştirak etmədiniz. Özbəkistanda məqsəd nə olacaq?
– Paris "Böyük Dəbilqə"sində iştirak etmədim, çünki məşqçi heyəti ilə birlikdə hazırlıq planına uyğun qərar verdik. Əsas diqqətim Daşkənddəki turnirə yönəlib. Məqsədim orada yaxşı çıxış edib beynəlxalq arenada özümü daha stabil göstərməkdir.

– Apreldə Avropa çempionatı baş tutacaq. Hədəfiniz nədir?
– Avropa çempionatı hər idmançı üçün böyük hədəfdir. Mənim də məqsədim orada maksimum nəticə göstərməkdir. Addım-addım irəliləyirəm, əsas prioritetim stabil və keyfiyyətli çıxış etməkdir. Hər yarış təcrübədir və məqsədim Avropada medal uğrunda mübarizə aparmaqdır.

Mahmud