Azərbaycan Basketbol Federasiyasının prezidenti Emin Əmrullayev "Gəncə" və "Sabah" komandaları arasında keçirilmiş ölkə Kubokunun final oyunundan sonra jurnalistlərin suallarını cavablandırıb.
Prosport.Az saytı həmin müsahibəni təqdim edir:
– Final oyununun nəticəsi sizin üçün nə dərəcədə gözlənilməz oldu?
– Əslində, adətən güclü olan qalib gəlir. “Gəncə”ni və komandanın azarkeşlərini təbrik etmək lazımdır. Bununla belə, “Sabah” da Azərbaycan basketbolunun güclü klublarındandır. Belə rəqabətin olması müəyyən mənada müsbət haldır. Azərbaycan Kubokunun formatı ABL-dən bir qədər fərqlənir. “Gəncə”nin heyətində milli komandamızın bir neçə əsas oyunçusu çıxış edir. Bu il Kubokun qalibi “Gəncə” oldu, onları təbrik edirəm. Finalda çox gözəl atmosfer var idi. Oyuna gələn və aktiv dəstək göstərən azarkeşlərə təşəkkür edirəm. Bu, basketbolu həm oyunçular, həm də tamaşaçılar üçün daha maraqlı edir.
– Yeni mövsümdə ABL-də “3+2” limitini qaytarmaq mümkündürmü?
– Mövcud limitimiz artıq FIBA qaydalarına uyğundur. Klublarımız avrokuboklarda 5 yerli və 7 legioner basketbolçu ilə çıxış edə bilir. Biz də eyni modeli tətbiq edirik ki, klublar tədricən inkişaf etsin. Limiti süni şəkildə 2 yerli oyunçuya endirmək ilk baxışda azərbaycanlı basketbolçular üçün daha çox imkan yaradır kimi görünə bilər. Amma praktikada bu, rəqabət səviyyəsini aşağı sala bilər. Düşünürəm ki, bir neçə ildən sonra yerli oyunçuların sayı və keyfiyyəti lazımi səviyyəyə çatarsa, bu formata qayıtmaq barədə düşünmək olar.
– “Gəncə” Kubokun qalibi kimi avrokuboklarda oynamağa layiqdirmi?
– Bütün klublar buna layiqdir. Amma format belədir ki, çempionat da başa çatmalıdır. Avrokuboklara vəsiqə əsasən çempionatdakı mövqelərə görə müəyyənləşir. Sevindirici haldır ki, əvvəlki illərdə federasiyanın dəstəyi ilə idarə olunan klubların əksəriyyəti artıq müstəqil idarəetməyə keçib və sponsorları var. Bu səbəbdən qərarın klub rəhbərləri ilə birgə verilməsi daha doğru olar. Yəqin ki, yay aylarının sonuna yaxın bu məsələ daha aktuallaşacaq. Federasiyanın mövqeyi aydındır: klublarımız avrokuboklarda nə qədər çox iştirak etsə, bir o qədər yaxşıdır. “Abşeron Layns”, “Neftçi” və “Sabah”ın avrokubok təcrübəsi ümumi səviyyəni artırır. Çox güman ki, 3 klubumuz olacaq, bəlkə də 4. Amma bu, klubların maliyyə imkanlarından və FIBA-nın ayırdığı kvotadan asılıdır. Biz istəyirik ki, klublarımız avrokubok səviyyəsinə çıxa bilsin.
– Milli komanda səviyyəsində dirçəliş hiss olunurmu?
– Milli səviyyədə ciddi dəyişiklikləri, düşünürəm ki, 2030-cu illərə yaxın görəcəyik. İlk real nəticələr U-16 kateqoriyasında görünməlidir. Qızlarda bu artıq hiss olunur. Ötən il U-18 komandamız yaxşı çıxış etdi. Bu basketbolçuların yaşı 16-17-dir. COVID dövründə məşqlər dayanmışdı və 2011-2012-ci il təvəllüdlü oyunçuların sayı azdır. Əsas ümidlər 2013-2014-cü il təvəllüdlülərlə bağlıdır. Onların səviyyəsi görülən işin keyfiyyətini göstərəcək və biz həmin nəsli 2029-2030-cu illərdə görəcəyik.
Bu o demək deyil ki, hazırkı milli komandaya ümid yoxdur. Sadəcə, 20 yaşdan yuxarı oyunçularımız azdır. Legioner limiti də bununla bağlıdır. Məqsədimiz odur ki, Azərbaycan basketbolunun yetirmələri təkcə ölkədə deyil, xarici liqalarda da oynasınlar. Açıq desəm, 2030-cu ildən əvvəl ciddi nəticə gözləmək real deyil. Zaman lazımdır. Amma indiki temp qorunarsa, fundamental dəyişikliklər mümkündür.
Növbəti mövsümdən coğrafiyanı bir qədər də genişləndirmək istəyirik. Uşaq basketbol liqalarının sayı artır, Ötən il U-13 Liqası keçirirdik, bu ildən U-11 də təşkil olunur. Qadın liqasının yaradılması isə gündəmdədir. Bu, ya gələn mövsüm, ya da ondan sonrakı mövsüm keçirilə bilər. İnanıram ki, qadın basketbolunda nəticələrə daha tez nail olmaq mümkündür. Kişi basketbolunda isə bir qədər çox vaxt tələb olunacaq. Biz inkişafı sistemli və mərhələli şəkildə davam etdirməyə çalışırıq.