21 yaşlı tamblinq üzrə gimnast Tofiq Əliyev Bakıda keçirilən Dünya Kubokunda gümüş medalla kifayətlənib. Komanda şəklində ikiqat dünya çempionumuz yarışdan sonra jurnalistlərə müsahibə verib.
Prosport.Az həmin müsahibəni təqdim edir:
– Dünya Kubokunda 2-ci oldunuz. Çempionluq üçün nə çatmadı?
– Finala lider kimi yollanmışdım. Amma finalda əzələlərim yorğun idi. Bu səbəbdən risk etmədim. Çünki yerli publika önündə medalsız qalmaq istəmirdim. Belə ehtimal da var idi. Ona görə çıxışımı daha da çətinləşdirmədim. Bacardığımı etdim və gümüş medala sahib çıxdım. Qızıl medal da qazana bilərdim. Sadəcə, hakimlərin yekun qərarı o oldu ki, keçid elementində ayaqlarımı bükmüşəm. Buna görə 0,6 xal silindi və bunun da nəticəsində 2-ci yeri tutdum.
– Komanda yoldaşınız Mixail Malkinə qızıl medalı buraxmaq sizi təəssüfləndirmir?
– Malkinin idmanda mənim yaşım qədər və bəlkə də daha çox təcrübəsi var. Mişa bayaq mənə dedi ki, fərdi çıxışda ilk dəfə fəxri kürsüdə birlikdə yer aldıq. Bunu çoxdan istəyirdik, təəssüf ki, bu alınmırdı. Bu gün bu gerçəkləşdi. Sevincliyəm ki, ilin startını 2 medalla verdik. Bizi apreldə Portuqaliyada Avropa çempionatı gözləyir, orada həm komanda hesabında, həm də fərdi olaraq uğurlu çıxış etmək istəyirik.
– Hakimlərin qərarına münasibətiniz necədir?
– Normal. Yekunda qərarı verən onlardır.
– Epizoda baxdınızmı?
– Hələ ki baxmaq imkanım olmayıb. Amma belə qərar verilibsə, bu barədə danışmaq mənə çox düşməz. Əgər ayağım bükülü sayılıbsa, bu barədə məşqlərdə bir az da işləyib, bunu düzəltməliyəm.
– Apreldə Danimarkada keçiriləcək "Face off" yarışı barədə nə deyə bilərsiniz?
– Liqa mərhələsində 6 tur olacaq. Norveçin "Links" klubunun tərkibində çıxış edəcəyəm. 6 mərhələnin 2-də yarışacağam. Final mərhələsinədək bunlar mənim üçün isinmə yarışları olacaq. Bu yarışlar Avropa çempionatından sonraya təsadüf edəcək. Portuqaliyadan birbaşa Danimarkaya gedəcəyəm.
– Ora favorit kimi getmək sizin üçün çətin deyil?
– "Face off" tamam başqa atmosferə malik yarışdır. Orada təcrübəmi daha da zənginləşdirəcəyəm... Azarkeşlərin mənim adımı çəkməsi məni çaşdırmır. Bu, bir çox idmançılara mane olur. Çünki cığırın səsini hərəkət zamanı eşitməliyik. Onda özümüzü daha yaxşı hiss edirik.