Azərbaycan Badminton Federasiyasında baş katib vəzifəsinə yeni təyinat olub.

Prosport.Az xəbər verir ki, bu vəzifəyə Əjdər Cəfərov təyin edilib.

Daha öncə Azərbaycan Badminton Federasiyasının prezidenti Taleh Ziyadovun idman məsələləri üzrə müşaviri vəzifəsini icra edən Cəfərov idman funksioneri kimi zəngin karyeraya malikdir.

O, 2011–2016-cı illərdə Azərbaycan Güləş Federasiyasının baş katibi vəzifəsində çalışıb. İdman ustası, əməkdar məşqçi və olimpiya kateqoriyalı beynəlxalq hakimdir.

3 Olimpiya Oyunlarında (Sinqapur-2010 Yeniyetmələrin Yay Olimpiya Oyunları, London-2012 Yay Olimpiya Oyunları, Nanjing-2014 Yeniyetmələrin Yay Olimpiya Oyunları) hakimlik edib.

2012-ci ildə Azərbaycan Respublikası Prezidentinin sərəncamı ilə “Tərəqqi” medalı ilə təltif olunub, Dünya Güləş Birliyi (UWW) tərəfindən güləş qaydalarının dünyada təbliğinə görə yüksək mükafata layiq görülüb. 2015-ci ildə Prezidentinin Fəxri diplomu ilə təltif edilib. Həmin il Bakıda keçirilən I Avropa Oyunlarında güləş yarışlarının beynəlxalq koordinatoru vəzifəsini icra edib.

Qeyd edək ki, Badminton Federasiyasında daha əvvəl bu vəzifəni Ramil Hacıyev icra edirdi.