Mingəçevir şəhəri və azad olunmuş Tərtərin Suqovuşan kəndində növbəti dəfə "Prezident kuboku-2023" keçiriləcək.

Prosport.Az-a Azərbaycan Kanoe və Avarçəkmə Federasiyasından (AKAF) verilən məlumata görə, ilk dəfə Avropa Kanoe Assosiasiyasının təqviminə daxil olan bu yarışda 20-dən artıq ölkə idmançılarının iştirak edəcəyi gözlənilir. Həmin ölkələr Bolqarıstan, Estoniya, Gürcüstan, Yunanıstan, İtaliya, Qazaxıstan, Latviya, Litva, Moldova, Şimali Makedoniya, Polşa, Rumıniya, Serbiya, Sloveniya, Türkiyə, Ukrayna və Özbəkistandır.

İlk dəfə bağlanış mərasimi Mingəçevirdə yox, Bakıda reallaşacaq.

Yarışın proqramı bu formada olacaq:

3 may – Mingəçevirdə parad
4 may – Suqovuşanda açılış mərasimi və yarışların ilk günü
5-6 may – Mingəçevirdə yarışlar
7 may – Bakı, Su İdman Sarayının qarşısı, bulvar

Mükafatlandırma mərasimindən sonra bədii hissə, şou proqram, tanınmış yerli müğənninin solo ifası və s. nəzərdə tutulub.

Qeyd edək ki, reqlamentə əsasən, yarışda iştirak edəcək ölkə idmançılarının (4 atlet və 1 məşqçi) məskunlaşması, qidalanması, akkreditasiya və transfer xərcləri Gənclər və İdman Nazirliyi və AKAF tərəfindən çəkiləcək. Heydər Əliyevin 100 illiyinə həsr olunan turnirdə 2005-2006 təvəllüdlü oğlan və qızlar 200, 500, 1000 m, 2007-2008-lər 200, 500 m və 2009-2010-lar 200 m məsafəyə yarışacaqlar.