Azərbaycan Kanoe və Avarçəkmə Federasiyasının (AKAF) adı dəyişdirilib.

Prosport.Az xəbər verir ki, bununla bağlı federasiyanın Ümumi Yığıncağında müvafiq qərar qəbul olunub.

Bu addım ölkəmizdə su idman növlərinin vahid platformada inkişafını təmin etmək, idarəetmədə çevikliyi artırmaq və beynəlxalq arenada daha effektiv təmsilçiliyə nail olmaq məqsədi daşıyır. Eyni zamanda populyarlığı artırmaq, kütləviliyi təmin etmək, yeniyetmə və gəncləri cəlb etmək əsas prioritetdir. 

Müvafiq olaraq federasiyanın adı dəyişdirilərək Azərbaycan Su İdmanı növləri Federasiyası (Azerbaijan Water Sports Federation) adlandırılacaq. Prosport.Az-ın məlumatına görə, bundan sonra federasiyanın daxilində təkcə kanoe, kayak və akademik avarçəkmə yox, drakon, raftinq, slalom qayıqları kimi növlər də olacaq.

Qeyd edək ki, bu federasiyanın adı 2022-ci ilin martınadək Azərbaycan Milli Avarçəkmə Federasiyası olub. Daha sonra ora "kanoe" sözü əlavə olunub və loqosu dəyişdirilib. Yeni adla federasiyanın loqosu isə hələ hazır deyil.

Onu da bildirək ki, Su İdmanı növləri Federasiyasının bir ara Azərbaycan Üzgüçülük Federasiyasına verilməsi məsələsi gündəmdə olub. Səbəb kimi bu federasiyada üzgüçülükdən başqa, su polosu və başqa növlərin də olması göstərilib.