Dünən “Qarabağ”ın "Nyukasl Yunayted"ə 1:6 məğlubiyyətinin bir neçə səbəbi vardı.
Soyuq başla analiz edəndə bunları görməmək mümkün deyil. Bəs hansılar idi onlar?
1. Erkən qollar. İlk 10 dəqiqədə 2 top buraxdıq. Bu, hesabın böyük alınmasında əsas faktor oldu. “Qarabağ”ın futbolçuları özlərini itirdi. Hətta “Enfild Roud”dakı ilk hissədə belə bərbad oynamamışdıq. İlk hissədə qapıya zərbə endirə bilmədik. Düzdür, sonradan İngiltərədə 1-ci penalti qərarının yanlış olduğu bildirildi. Ancaq qeydə alınan 1-ci və 2-ci penalti “Qarabağ” üzərində hesabın katastrofik həddə çatmasına gətirib çıxardı. Ancaq 2-ci hissədə çox qol olmayacağı görünən idi. “Nyukasl” istəyinə çatmışdı, “Qarabağ” da qol vurmaq iqtidarında deyildi. Həmkarlarıma fasilədə hesabın 1:6 ola biləcəyini demişdim.
2. Edi Hau bicliyi. Hau oyunu yaxşı oxumuşdu, bütün matçlarımızı izləmişdi. Antoni Qordonun alman hücumçu Niklas Voltemade ilə hücum xəttində yerdəyişməsi sürpriz addım idi. Oyun mərkəzdə Qordon üzərində qurulmuşdu. Bu da ilk hissədə Qordonun 4 qol vurmasına və sonda MVP seçilməsinə səbəb oldu.
3. Qurban Qurbanovun (QQ) hücum taktikası. QQ bu matçda ənənəsinə sadiq qaldı. Yenə “Liverpul”la oyunda olduğu kimi, eyni heyət və eyni taktiki düzülüşü – 4-2-3-1-i sınadı. Bu, filin önünə qarışqa ilə çıxmaq kimi bir şey idi. QQ məğlubiyyətə baxmayaraq, yaxşı futbol – hücum oyunu göstərmək istəyirdi, ancaq əksi baş verdi. Liverpulda 5-ci qoldan sonra (67-ci dəqiqə) “Qarabağ” 5-li müdafiəyə keçmişdisə, bu dəfə erkən qollar QQ-ni fasilədən sonra bunu etməyə məcbur etdi. İnsafən uzun müddət oynamayan Bədəvi Hüseynov 5-li müdafiədə özünü yaxşı göstərdi. Bir sözlə, 5-2-2-1 taktiki düzülüşündən sonra komanda özünə gəldi, müdafiədə etibarlı oynadı və 2-ci hissədə “Nyukasl”dan daha çox qapıya zərbə vurmaq imkanı əldə etdi.
4. Erkən əvəzetmə. 22-ci dəqiqədə Bəhlul Mustafazadənin zədələnib çıxması da sonrakı 3 topda rol oynadı. Dani Boltun mərkəz müdafiəçisi funksiyası olmadığından, orta xətt tamamilə iflic vəziyyətinə düşdü. Yaxşı ki, Mateuş Koxalski kimi qapıçının seyvləri vardı. Yeri gəlmişkən, Bəhlulun zədəsinin ciddi olduğunu düşünmürəm, belə zədələr sürətli oyun zamanı əzələlərin gərginliyə dözməməsindən irəli gəlir.
5. Dayaq yarımmüdafiəçilərinin özünü doğrultmaması. Nə Filip Yankoviç, nə də Pedro Bikalyo öz günündə deyildi. 6 nömrə oynayan hər 2 futbolçu 2 qiymətinə layiqdir. “Sağsağanlar” müdafiəçilərimiz önünə onların yoxluğunu hiss etmədən çıxırdı. Ümumiyyətlə, Yankoviç uzun zədədən sonra özünə gələ bilməyib və bu gedişlə yayda göndərilə bilər.
6. Rəqibin İngiltərə təmsilçisi olması. Bu hissəni sona saxlamışam ki, darmadağınla uduzmaq bəhanə kimi qəbul edilməsin. Əslində bu oyun göstərdi ki, düzgün taktika seçilsəydi belə, bizim “Nyukasl” önündə şansımız yox idi. “Futbol biliciləri”miz, “ekspert”lərimiz PSJ-dənsə, “Nyukasl”la düşdüyümüzü düşünəndə sevinirdi. Hiss olunurdu ki, bunların çoxu ömürlərini İtaliya (dünən bütün klubları uduzdu) və İspaniya çempionatına baxmaqla keçirənlərdir. Və ya “Çelsi”nin 2 və ya 3-cü heyəti ilə heç-heçəyə aldananlar da vardı. İngiltərədə autsayder “Vulverhempton”la oyunda belə şansımız yoxdur (adamlar dünən lideri büdrətdi). Qardaş, alınmır bizdə İngiltərə futboluna qarşı oyunlar. Hələ ki bunun düsturunu tapmaq üçün çox böyüməliyik.
Səbuhi MUSA